റേഷൻ സ്മാർട്ട്​ കാർഡ്​: തട്ടിപ്പുമായി റേഷൻ വ്യാപാരി സംഘടന

തൃശൂർ: റേഷൻ സ്മാർട്ട്​ കാർഡ്​ തയാറാക്കാൻ​ അധികതുക വാങ്ങി റേഷൻ വ്യാപാരി സംഘടന കാർഡ്​ ഉടമകളെ പിഴിയുന്നു. സംഘടനയിൽ അംഗമായ വ്യാപാരികൾ നടത്തുന്ന റേഷൻ കടയിൽ കാർഡുള്ളവരാണ്​ തട്ടിപ്പിന്​​ ഇരയാവുന്നത്​. കാർഡ്​ ഒന്നിന്​ ഒരാളിൽനിന്ന്​ 15 രൂപ മുതൽ അധിക തുകയാണ്​ ഈടാക്കുന്നത്​. കാർഡ്​ സ്മാർട്ടാക്കി നൽകുന്നതിന്​ തിരുവനന്തപുരം കേന്ദ്രമായി ഒരു സ്ഥാപനത്തെ ചുമതലപ്പെടുത്തിയാണ്​ ജനത്തിൽനിന്ന്​ അമിത തുക ഈടാക്കുന്നത്​. കാർഡ്​ പ്രിന്‍റ്​ ചെയ്യുന്ന നടപടികളുടെ ഭാഗമായി ഉടമയുടെ മൊബൈൽഫോണിൽ ഒ.ടി.പി സന്ദേശം എത്തുക പതിവാണ്​. വ്യാപാരികൾ നൽകിയ കാർഡ്​ ഉടമകളുടെ മൊബൈൽ നമ്പറുകളുടെ അടിസ്ഥാനത്തിൽ സ്ഥാപനത്തിൽ നിന്നുള്ളവർ കാർഡ്​ പ്രിന്‍റ്​ ചെയ്യുന്നതിന്​ പരക്കെ വിളിക്കുകയാണ്​. കാർഡ്​ പ്രിന്‍റ്​ ചെയ്യുന്നതിന്​ താൻ അപേക്ഷ പോലും നൽകിയിട്ടില്ലെന്ന്​ പറയുന്നവരോട്,​ സർക്കാർ ചുമതലപ്പെടുത്തിയ ഏജൻസിയാണ്​ വിളിക്കുന്നതെന്ന മറുപടിയാണ്​ ലഭിക്കുന്നത്​. ഇത്​ ചോദ്യം ചെയ്യുന്നവരോട്​ നിയമപരമായി ചെയ്യാനുള്ളതെല്ലാം ചെയ്​തോ എന്ന വെല്ലുവിളിയും ഇവർ ഉയർത്തുന്നു​. അതേസമയം സ്മാർട്ട്​ കാർഡ്​ പ്രിന്‍റ്​ ചെയ്യുന്നതിന്​ ഒ.ടി.പി നമ്പർ നൽകിയാൽ കാർഡ്​ റേഷൻ വ്യാപാരിക്ക്​ നൽകും. സർക്കാർ ഉത്തരവ്​​ അനുസരിച്ച് സ്മാർട്ട്​ റേഷൻ കാർഡിനായി വാങ്ങേണ്ട ​ 65 രൂപക്ക്​ പകരം ചുരുങ്ങിയത്​ 80 രൂപവരെ വാങ്ങുകയാണ്​ സംഘടന ചെയ്യുന്നത്​. സർക്കാറിന്‍റെ 100 ദിന പരിപാടികളിൽ ഒന്നാണ്​ സ്മാർട്ട്​ കാർഡ്​വത്​കരണം. എന്നാൽ സ്മാർട്ട്​ കാർഡ്​ ഇപ്പോൾ നിർബന്ധമാക്കിയിട്ടില്ല. മാത്രമല്ല കാർഡ്​ ഉപയോഗിക്കുന്നതിന്​ ക്യൂആർ കോഡ്​ പോലും തയാറാവുന്നേയുള്ളൂ. കാർഡ്​ ഉടമയുടെ ​പേരല്ലാതെ മറ്റൊന്നും നിലവിൽ കാർഡിൽ കാണാനാവില്ല. കാര്യങ്ങൾ ഇങ്ങനെയായിരിക്കെ ജനത്തെ പിഴിയാൻ തട്ടിപ്പുമായി ഇറങ്ങിയിരിക്കുകയാണ്​​ ഒരുകൂട്ടർ. റസിഡന്‍റ്​സ്​ അസോസിയേഷനുകൾ വഴി അക്ഷയ സെന്‍ററുകൾ, കോമൺ സർവിസ്​ ​​സെന്‍ററുകൾ മുഖേന വിവിധ മേഖലകളിൽ ക്യാമ്പ്​ നടത്തി റേഷൻ കാർഡ്​ തയാറാക്കി നൽകുന്നുണ്ട്​. അതേസമയം സർക്കാറിന്‍റെ പേര്​ പറഞ്ഞ്​ ഇത്തരത്തിൽ ക്യാമ്പ്​ നടത്തി പണം പിടുങ്ങുന്നതിന്​ എതിരെ പൊതു വിതരണ വകുപ്പ്​ ഇതുവരെ നടപടിയൊന്നും സ്വീകരിച്ചിട്ടില്ല.