വിധി പാലിച്ചില്ല; വാറണ്ട് അയക്കാൻ ഉത്തരവ്

വിധി പാലിച്ചില്ല; വാറന്‍റ്​ അയക്കാൻ ഉത്തരവ് തൃശൂർ: വിധിപ്രകാരം സ്വർണാഭരണങ്ങളും നഷ്ടവും നൽകാത്തതിനെതിരെ ഫയൽ ചെയ്ത ഹർജിയിൽ വാറന്‍റ്​ അയക്കാൻ തൃശൂർ ഉപഭോക്തൃ തർക്ക പരിഹാര കമീഷന്‍റെ ഉത്തരവ്​. തളിക്കുളം പുളിപ്പറമ്പിൽ ഓമന അശോകൻ ഫയൽ ചെയ്ത ഹർജിയിലാണ് തൃത്താലയിലുള്ള യു. അബ്​ദുല്ലക്കെതിരെ ഉത്തരവായത്. അബ്​ദുല്ല നടത്തിയ ജ്വല്ലറിയിലെ സ്വർണാഭരണ പദ്ധതിയിൽ ഓമന സ്വർണം നിക്ഷേപിച്ചിരുന്നു. പദ്ധതി പൂർത്തിയായപ്പോൾ ആഭരണങ്ങൾ നൽകാത്തതിനെതിരെ കമീഷനിൽ ഹർജി ഫയൽ ചെയ്യുകയും അനുകൂല വിധി സമ്പാദിക്കുകയും ചെയ്തു. വിധിപ്രകാരം ഹർജിക്കാരിക്ക് 116.160 ഗ്രാം സ്വർണാഭരണങ്ങളും 5,000 രൂപ നഷ്ടപരിഹാരവും നൽകേണ്ടതായിരുന്നു. അത്​ പാലിച്ചില്ല. തുടർന്നാണ്​ വീണ്ടും കമീഷനെ സമീപിച്ചത്​. ഹർജി പരിഗണിച്ച പ്രസിഡന്‍റ്​ സി.ടി. സാബു, മെംബർ എസ്​. ശ്രീജ എന്നിവരടങ്ങിയ കമീഷൻ വാറന്‍റ്​ അയക്കാൻ ഉത്തരവിടുകയായിരുന്നു. ഹർജിക്കാരനുവേണ്ടി അഡ്വ. എ.ഡി. ബെന്നി ഹാജരായി.