പോക്​സോ കേസ്​ ഇരകൾക്കുള്ള പുനരധിവാസ കേന്ദ്രം ഒരുങ്ങി

ഘട്ടമായി 98 അന്തേവാസികൾ രാമവർമപുരത്തെ പുനരധിവാസ കേന്ദ്രത്തിലെത്തും തൃശൂർ: സംസ്ഥാനത്തെ പോക്​സോ കേസ്​ ഇരകൾക്കുള്ള പുനരധിവാസ കേന്ദ്രം തൃശൂരിലേക്ക്​ മാറ്റാനുള്ള ഒരുക്കം പൂർത്തിയായി. രാമവർമപുരത്തെ മാതൃക പുനരധിവാസ കേന്ദ്രത്തിൽ ജീവനക്കാരുൾപ്പെടെ കോവിഡ്​ പരിശോധനകൾ പൂർത്തിയാക്കി ജോലിയിൽ പ്രവേശിച്ചു. വിവിധ ജില്ലകളിലെ നിർഭയ സൻെററുകളിൽ കഴിയുന്ന 18 വയസ്സിന്​ താഴെയുള്ള 98 പേരാണ്​ പുനരധിവാസ കേന്ദ്രത്തിലെത്തുക.

ഇവരുടെ ഔദ്യോഗിക രേഖകളുടെ വിശദമായ പരിശോധന പൂർത്തിയാക്കി ഘട്ടം ഘട്ടമായായിരിക്കും ഇവിടേക്ക്​ മാറ്റുക. എറണാകുളം, പത്തനംതിട്ട ജില്ലകളിലെ നിർഭയ ഹോമുകളിലെ അന്തേവാസികളുടെ രേഖകളുടെ പരിശോധന പൂർത്തിയായി. ഇവരെ രണ്ടു ദിവസത്തിനകം രാമവർമപുരത്തേക്ക്​ കൊണ്ടുവരുമെന്ന്​ ചൈൽഡ്​ വെൽഫെയർ കമ്മിറ്റി ചെയർമാൻ ഡോ. കെ.ജി. വിശ്വനാഥൻ 'മാധ്യമ'ത്തോട്​ പറഞ്ഞു. ആഴ്​ചക്കകം മറ്റ്​ ജില്ലകളിലെ കുട്ടികളെയും എത്തിക്കും. സ്വന്തം വീട്ടിൽ തുടരാൻ കഴിയാത്ത കുട്ടികളാണ്​ നിർഭയ ഷെൽട്ടർ ഹോമുകളിൽ താമസിക്കുന്നത്​. ഇവർക്ക്​ കൂടുതൽ പഠന-തൊഴിൽ സാധ്യതകൾ തുറന്നുകൊടുക്കുകയും മെച്ചപ്പെട്ട ഭാവി ലക്ഷ്യമിടുന്നവർക്ക്​ അതിന്​ അവസരമൊരുക്കുകയുമാണ്​ രാമവർമപുരത്തെ പുനരധിവാസ കേന്ദ്രത്തിലൂടെ ലക്ഷ്യമിടുന്നത്​.

വ്യക്തിഗത സുരക്ഷ പദ്ധതി ഓരോ നിർഭയ ഹോമുകളും തയാറാക്കിവരുന്നുണ്ട്​. ഇവ ആറുമാസം കൂട​ു​േമ്പാൾ പുത​ുക്കേണ്ടതുണ്ട്​. ഇവയുടെ സൂക്ഷ്​മമായ പരിശോധനയാണ്​ രാമവർമപുരത്തേക്ക്​ മാറ്റുന്നതിന്​ മുന്നോടിയായി നടന്നുവരുന്നത്​. പലരുടെയും വ്യക്തിഗത രേഖ പുതുക്കിയിട്ടില്ല. ഇത്​ പുതുക്കിയ ശേഷമേ സ്ഥലം മാറ്റൂ. മാത്രമല്ല, അന്തേവാസികൾക്ക്​ കോവിഡ്​ ഉൾപ്പെടെ പരിശോധനയും പൂർത്തിയാക്കേണ്ടതുണ്ട്​. വിവിധ ജില്ലകളെ കൂട്ടിച്ചേർത്ത്​ സോണുകളാക്കി തിരിച്ചാണ്​ രേഖകൾ പരിശോധിച്ച്​ നടപടിക്രമം പൂർത്തിയാക്കുക. പഠനാവശ്യം പരിഗണിച്ചും ആരോഗ്യാവസ്ഥ പരിഗണിച്ചും ജില്ലകളിലെ നിർഭയ സൻെററുകളിൽ ചിലർ തുടരും. ബാക്കിയുള്ളവരെയാണ്​ രാമവർമപുരത്തേക്ക്​ മാറ്റുന്നത്​.