സംസ്ഥാന ക്രോസ്കൺട്രി ചാമ്പ്യൻഷിപ് നാളെ

തൃശൂർ: ജില്ല അത്‌ലറ്റിക്‌സ് അസോസിയേഷൻ നേതൃത്വത്തിൽ 25ാം കല്യാൺ സിൽക്‌സ് സംസ്ഥാന ക്രോസ്കൺട്രി ചാമ്പ്യൻഷിപ് ഞായറാഴ്​ച തൃശൂരിൽ നടക്കുമെന്ന് സംഘാടകർ വാർത്തസമ്മേളനത്തിൽ അറിയിച്ചു. തൃശൂർ അക്വാട്ടിക് കോംപ്ലക്‌സിന് മുന്നിൽനിന്ന് തുടങ്ങി വടക്കേ ബസ്​ സ്​റ്റാൻഡ്​, ഭാരതീയ വിദ്യാഭവൻ, സാഹിത്യ അക്കാദമി, രാമനിലയം, യാത്രി നിവാസ്, ചെറുമുക്ക് ക്ഷേത്രം ജങ്​ഷൻ, അശ്വിനി ജങ്​ഷൻ വഴി അക്വാട്ടിക് കോംപ്ലക്‌സിന് മുന്നിൽ സമാപിക്കും. രാവിലെ 6.30ന് ജില്ല പൊലീസ് മേധാവി ആർ. ആദിത്യ ഫ്ലാഗ്ഓഫ് ചെയ്യും. പത്ത് കിലോമീറ്ററിലുള്ള പുരുഷ വിഭാഗം മത്സരമാണ് നടക്കുക. സമാപന സമ്മേളനത്തിൽ കൃഷി മന്ത്രി വി.എസ്. സുനിൽകുമാർ മുഖ്യാതിഥിയാകും. ഈ മാസം 21ന് പഞ്ചാബിലെ ചണ്ഡിഗഢിൽ നടക്കുന്ന 51ാമത് ദേശീയ ക്രോസ്കൺട്രി ചാമ്പ്യൻഷിപ്പിൽ പങ്കെടുക്കാനുള്ള കേരള ടീമിനെ മത്സരത്തിൽനിന്ന്​ തിരഞ്ഞെടുക്കും. വാർത്തസമ്മേളനത്തിൽ ജില്ല അത്‌ലറ്റിക്‌സ് അസോസിയേഷൻ പ്രസിഡൻറ്​ പ്രഫ. ഇ.യു. രാജൻ, സെക്രട്ടറി സി.ആർ. വേണുഗോപാലൻ, സംസ്ഥാന വൈസ് പ്രസിഡൻറ്​ പ്രഫ. പി.എം. നാരായണൻ നമ്പൂതിരി, ട്രഷറർ വി. ഹേമലത എന്നിവർ പങ്കെടുത്തു.