കലാകാരന്മാർക്ക്​ കോവിഡ്​ സമാശ്വാസം രണ്ടാം ഘട്ടം

തൃശൂർ: കോവിഡ്​ മൂലം ഉപജീവന മാർഗം നഷ്​ടപ്പെട്ട കലാകാരന്മാർക്കും കലാപ്രകടനത്തിന്​ പശ്ചാത്തലം ഒരുക്കുന്നവർക്കും മുഖ്യമന്ത്രിയുടെ ദുരിതാശ്വാസ നിധിയില്‍നിന്ന്​ 1000 രൂപ ധനസഹായം നൽകുന്ന പദ്ധതിയിലേക്ക് സാംസ്​കാരിക വകുപ്പി​ൻെറ വെബ്‌സൈറ്റ് (http://www.keralaculture.org/covid_relief_scheme) മുഖേന അപേക്ഷിക്കാം. അഞ്ച്​ വർഷമായി കലാമേഖലയിൽ സജീവമായും തുടർച്ചയായും പ്രവർത്തിക്കുന്നവർക്കാണ്​ ആനുകൂല്യം. ആദ്യഘട്ടത്തിൽ സാങ്കേതിക കാരണങ്ങളാൽ അപേക്ഷ നിരസിക്കപ്പെട്ടവർക്കും അവസരമുണ്ട്​. നേരത്തേ കോവിഡ് ​ധനസഹായം ലഭിച്ചവർ അപേക്ഷിക്കരുത്​. പെൻഷനോ മറ്റ് ആനുകൂല്യങ്ങളോ ലഭിക്കാത്തവർ, സർക്കാർ-പൊതുമേഖല സ്ഥാപനങ്ങൾ, ബോർഡുകൾ, കോർപറേഷനുകൾ തുടങ്ങിയവയിൽനിന്നു പ്രതിമാസ പ്രതിഫലമോ ധനസഹായമോ ശമ്പളമോ പെൻഷനോ കൈപ്പറ്റാത്തവർ, കലാകാര ക്ഷേമനിധിയിൽ അംഗത്വം ഇല്ലാത്തവർ എന്നിവർക്കാണ് സഹായം ലഭിക്കുക. അപേക്ഷ സ്വീകരിക്കുന്ന അവസാന തീയതി ഈ മാസം 20. ഓൺലൈനായി സമർപ്പിക്കാൻ താഴെ പറയുന്ന രേഖകള്‍ അപേക്ഷയോടൊപ്പം അപ്‌ലോഡ് ചെയ്യണം: കലാരംഗത്ത് കഴിഞ്ഞ അഞ്ച്​ വർഷമായി പ്രവർത്തിക്കുന്നുണ്ടെന്നും കലാപ്രവർത്തനം ഉപജീവന മാർഗമാണെന്നും തെളിയിക്കുന്ന സാക്ഷ്യപത്രം (തദ്ദേശസ്വയംഭരണ വകുപ്പിലെ പ്രതിനിധി/സെക്രട്ടറി/ഗസറ്റഡ് ഓഫിസർ/എം.പി/എം.എൽ.എ സാക്ഷ്യപ്പെടുത്തിയത്), ആധാർ കാർഡ്, റേഷൻ കാർഡ്, ബാങ്ക് പാസ് ബുക്ക് (അപേക്ഷക​ൻെറ പേരിലുള്ള അക്കൗണ്ട് നമ്പര്‍, ഐ.എഫ്.എസ്.സി കോഡ്, ബ്രാഞ്ച് വ്യക്തമായിരിക്കണം, അക്കൗണ്ട് ആക്​ടീവ് ആയിരിക്കണം). സംശയങ്ങൾക്ക്​ കേരള സംഗീത നാടക അക്കാദമിയുമായി 9447092134, 0487 2332134 എന്നീ നമ്പറുകളില്‍ ബന്ധപ്പെടാം.