കോവിഡ്​: വേണം, മെഡിക്കൽ കോളജിന്​ ചികിത്സ

മുളകുന്നത്തുകാവ്​: മധ്യ കേരളത്തിലെ പൊതുജനാരോഗ്യ കേന്ദ്രത്തിന്​ തലവേദനയായി കോവിഡ്​ വ്യാപനം​. തൃശൂരിനെ കൂടാതെ പാലക്കാട്​, മലപ്പുറം ജില്ലകളിൽ നിന്നുള്ളവർ ആശ്രയിക്കുന്ന തൃശൂർ ഗവ. മെഡിക്കൽ കോളജിൽ കർശന കോവിഡ്​ പെരുമാറ്റച്ചട്ടം പാലിക്കാനാവുന്നില്ല. ചികിത്സ തേടിയെത്തുന്ന സാധാരണക്കാരും ഡോക്​ടർമാരടക്കമുള്ള ആരോഗ്യപ്രവർത്തകരും ഇതുമൂലം ബുദ്ധിമുട്ടുകയാണ്​. വാർഡുകളിൽ ചികിത്സയിലിരിക്കുന്ന രോഗികൾക്ക് കോവിഡ് സ്ഥിരീകരിക്കുന്നത് ജീവനക്കാരിൽ കടുത്ത ആശങ്കയുളവാക്കുന്നു. രോഗികളെ പരിചരിക്കാൻ വേണ്ടത്ര സുരക്ഷ ഒരുക്കുന്നില്ലെന്നാണ്​ ആ​േരാഗ്യപ്രവർത്തകരുടെ ആരോപണം. നേരത്തെ രണ്ട്​ രോഗികൾക്ക്​ കോവിഡ്​ സ്​ഥിരീകരിച്ചുവെങ്കിലും ജീവനക്കാരുടെ പരിശോധന നടത്താൻ അധികൃതർ തയാറായില്ല. തുടർന്ന്​ വിവിധ സംഘടനകളുടെ നേതൃത്വത്തിൽ പ്രതിഷേധം ഉണ്ടായതിന്​ പിന്നാലെയാണ്​ പരിശോധന അടക്കം നടത്തിയത്​. ഇത്തരം സംഭവങ്ങൾ ആവർത്തിക്കുന്നത് മൂലം പല ജീവനക്കാരും വീടുകളിലേക്ക് പോകാൻ മടിക്കുകയാണ്​. ഭൂരിഭാഗം ജീവനക്കാരും ഡോക്ടർമാരും പ്രാഥമിക സമ്പർക്ക പട്ടികയിൽ വരുന്നത് മൂലം നിർബന്ധമായും 14 ദിവസം നിരീക്ഷണത്തിലിരിക്കേണ്ടിയും വരുന്നുണ്ട്​. ഓർത്തോ വാർഡിലെ രണ്ട് പേർക്ക് രോഗം സ്ഥിരീകരിച്ചതോടെ രോഗികളും കൂട്ടിരിപ്പുകാരും ഡോക്ടർമാരും ജീവനക്കാരുമടക്കം 150 പേരാണ് നിരീക്ഷണത്തിലുള്ളത്. നേര​െത്ത ജനറൽ വാർഡിൽ രണ്ട് പേർക്ക് കോവിഡ് സ്ഥിരീകരിച്ചപ്പോൾ നൂറിലേറെ ആശുപത്രി ജീവനക്കാരടക്കം മൂന്നൂറിലേറെ പേരാണ് നിരീക്ഷണത്തിലായത്​. കുറഞ്ഞ ചെലവിൽ ചികിത്സ ലഭിക്കുന്നതിനാൽ ഒ.പികളിൽ തിരക്ക് ഏറെയാണ്​. പ്രതിദിനം ഒ.പികളിൽ 1500ലധികം പേർ ചികിത്സ തേടി എത്തുന്നുണ്ട്​. മാസ്‌ക് ഉപയോഗിക്കുന്നുണ്ടെങ്കിലും ശാസ്​ത്രീയമായല്ല വെക്കുന്നത്​. കൂട്ടംകൂടി നിന്നുള്ള സംഭാഷണങ്ങൾ നടക്കുമ്പോഴും ഇവ നിയന്ത്രിക്കാൻ ആവശ്യമായ സംവിധാനം ഇല്ലെന്നും പരാതിയുണ്ട്. രണ്ട് പേർക്ക് കോവിഡ് സ്ഥിരീകരിച്ചിട്ടും ഓർത്തോ ഒ.പികളിൽ കഴിഞ്ഞ ദിവസങ്ങളിലും നിരവധി പേരാണ് എത്തുന്നത്. രോഗികളെയും അവർക്ക് ഒപ്പം വരുന്നവരെയും സാമൂഹിക അകലം പാലിച്ച് നിർത്താനുള്ള ക്രമീകരണത്തി​ൻെറ അപര്യാപ്​തത വല്ലാതെ നിഴലിക്കുന്നുണ്ട്​.