പ്ലസ്ടു വിജയം: ചാലിശ്ശേരി ഗവ. ഹയർ സെക്കൻഡറി സ്കൂളിന്​ ഇരട്ടി മധുരം

പെരുമ്പിലാവ്: ചാലിശ്ശേരി ഗവ. ഹയർ സെക്കൻഡറി സ്കൂളിൽ പ്ലസ്ടുവിന് ലഭിച്ച 95 ശതമാനം വിജയം സ്കൂളിനും ഗ്രാമത്തിനും ഇരട്ടി മധുരമായി. ഇത്തവണ എസ്.എസ്.എൽ.സിക്ക് സ്കൂളിന് നൂറ് ശതമാനം വിജയം ലഭിച്ചിരുന്നു. ഇതിനു പിറകെ വന്ന പ്ലസ്ടുവി​ൻെറ വിജയശതമാനവും അഭിമാനകരമായ നേട്ടമായി. 323 വിദ്യാർഥികൾ പരീക്ഷ എഴുതിയതിൽ 306 പേർ വിജയിച്ചു. 13 വിദ്യാർഥികൾ എല്ലാ വിഷയത്തിലും എ പ്ലസ് നേടി. തൃത്താല സബ് ജില്ലയിൽ ഏറ്റവും ഉയർന്ന എ പ്ലസ് നേട്ടത്തിന് അർഹത ലഭിച്ചു. കൂടാതെ 19 പേർക്ക് അഞ്ച് വിഷയത്തിൽ എ പ്ലസും ലഭിച്ചു. 1200ൽ 1196 മാർക്ക് വാങ്ങി ഫൗസുദ്ദീൻ അബ്​ദുൽ ഹമീദ് ഒന്നാം സ്ഥാനം നേടിയതും സ്കൂളിനഭിമാനമായി. സംസ്ഥാന ഗണിത മേളയിലും ഫൗസുദ്ദീന് എ ഗ്രേഡ് ലഭിച്ചിരുന്നു. 1193 മാർക്ക് നേടി ഫഹീമ രണ്ടാം സ്ഥാനത്തെത്തി. പത്ത് വർഷം മുമ്പ് സ്കൂളിലെത്തിയ പ്രിൻസിപ്പൽ ഗീതാ ജോസഫ്, സഹപ്രവർത്തകരായ അധ്യാപകർ, പി.ടി.എ പ്രസിഡൻറ്​ പി.കെ. കിഷോർ എന്നിവരുടെ നേതൃത്വത്തിൽ ഒരേ ചിന്തയോടും മനസ്സോടും ഉള്ള പ്രവർത്തനമാണ് വിദ്യാർഥികളുടെ മികച്ച വിജയത്തിന് കാരണമായതെന്ന് രക്ഷിതാക്കൾ പറയുന്നു. വിജയിച്ച വിദ്യാർഥികളെ പ്രിൻസിപ്പൽ ഗീതാ ജോസഫ്, പ്രധാനാധ്യാപിക ടി.എസ്. ദേവിക, പി.ടി.എ പ്രസിഡൻറ് പി.കെ. കിഷോർ എന്നിവർ അഭിനന്ദിച്ചു.