കാർഷിക സർവകലാശാല വി.സി: ഗവർണർ നിലപാട്​ വ്യക്തമാക്കണം -കെ.എ.യു സംരക്ഷണ സമിതി

തൃപ്രയാർ: ഒക്ടോബർ 15ന് ഒഴിവ് വരുന്ന കേരള സര്‍വകലാശാലയിൽ വൈസ്​ ചാൻസലർ നിയമനത്തിൽ സമിതി രൂപവത്​കരിക്കാൻ ധിറുതി കാട്ടുന്ന ചാൻസലറായ ഗവർണർ ആ താൽപര്യം കാർഷിക സർവകലാശാലയുടെ കാര്യത്തിൽ കാണിക്കാത്തതെന്തെന്ന്​ കെ.എ.യു സംരക്ഷണ സമിതി. കാര്‍ഷിക സര്‍വകലാശാല വി.സിയുടെ കാലാവധി ഒക്ടോബര്‍ ഏഴിന് തീരുകയാണ്. സമിതി രൂപവത്​കരിക്കാൻ ജനറൽ കൗൺസിൽ പ്രതിനിധിയെ നിയോഗിക്കണമെന്ന് ആവശ്യപ്പെട്ട് ഗവര്‍ണര്‍ പല തവണ സർവകലാശാലക്ക് കത്ത് നൽകി. യോഗത്തിന് രണ്ട് തവണ അംഗങ്ങൾക്ക് നോട്ടീസ് നൽകിയെങ്കിലും നീട്ടി​വെച്ചു. ചാൻസലറുടെ നിർദേശത്തിന് പുല്ലുവില നൽകാത്ത കാർഷിക വി.സിക്കെതിരെ നടപടിയെടുക്കാൻ ഗവർണർ ധൈര്യപ്പെടാത്തത്​ എന്തെന്ന്​ വ്യക്തമാക്കണം. സംരക്ഷണ സമിതി നടത്തിയ സമരങ്ങളെ തുടർന്ന്​ സർവകലാശാലയിലെ കെടുകാര്യസ്ഥതയും ജനാധിപത്യ വിരുദ്ധതയും മാധ്യമങ്ങൾ തുടർച്ചയായി റിപ്പോർട്ട്​ ചെയ്തിരുന്നു. ഇക്കാര്യത്തിൽ ചാൻസലർ ഇതുവരെ പ്രതികരിച്ചിട്ടില്ല. ഇത്തരത്തിൽ രണ്ട്​ സമീപനം ഉണ്ടാകുന്നതിലെ അനൗചിത്യം പരിശോധിക്കണം. കണ്ണൂര്‍ സര്‍വകലാശാലയിലെ അസോസിയേറ്റ് പ്രഫസര്‍ നിയമനം സംബന്ധിച്ച് അന്വേഷണം നടത്താതെ ആരോ നൽകിയ പരാതിയിൽ ഉന്നയിച്ച ക്രമക്കേടുകള്‍ ശരിയെന്ന രീതിയിൽ പരസ്യ പ്രസ്താവന നടത്തുന്ന ഗവർണർ കാര്‍ഷിക സര്‍വകലാശാല വൈസ് ചാന്‍സലർ ഡോ. ആർ. ചന്ദ്രബാബു ആ സ്ഥാനം നേടാൻ തെറ്റായ വിവരങ്ങള്‍ നല്‍കിയെന്ന പരാതി കിട്ടിയിട്ടും അന്വേഷണം നടത്തിയിട്ടില്ല. ഇക്കാര്യം അന്വേഷിച്ച്​ മൂന്ന്​ മാസത്തിനകം നടപടി കൈക്കൊള്ളണമെന്ന് കഴിഞ്ഞ ജൂൺ 21ന് ഹൈകോടതി ഉത്തരവിട്ടിരുന്നു. അക്കാര്യത്തിലും നടപടി ഉണ്ടായിട്ടില്ല. ചാൻസലർ പദവിയുടെ മഹനീയത കാത്തുസൂക്ഷിക്കാൻ ഗവർണർ തയാറാകണമെന്നും വൈസ് ചാൻസലർക്കെതിരെ അടിയന്തര നടപടിക്ക് തയാറാകണമെന്നും സംരക്ഷണ സമിതി വാർത്തകുറിപ്പിൽ ആവശ്യപ്പെട്ടു.