ഇ-വേ ബിൽ സ്വർണ വ്യാപാര മേഖലയെ തകർക്കുമെന്ന് വ്യാപാരികൾ

ഇ-വേ ബിൽ സ്വർണ വ്യാപാര മേഖലയെ തകർക്കുമെന്ന് വ്യാപാരികൾ തൃശൂർ: ജി.എസ്.ടി ഉദ്യോഗസ്ഥർ നടത്തുന്ന ദ്രോഹം അവസാനിപ്പിക്കണമെന്ന് ഗോൾഡ് ആൻഡ്​ സിൽവർ ഡീലേഴ്‌സ് അസോസിയേഷൻ ഭാരവാഹികൾ വാർത്തസമ്മേളനത്തിൽ ആവശ്യപ്പെട്ടു. 'ഇ-വേ ബിൽ' കേരളത്തിലെ സ്വർണ വ്യാപാര മേഖലയെ തകർക്കുമെന്നും ഇവർ പറഞ്ഞു. രണ്ടുലക്ഷം രൂപക്ക് മുകളിലുള്ള സ്വർണം വാണിജ്യാവശ്യത്തിന് കൊണ്ടുപോകാൻ ഇ-വേ ബിൽ നിർബന്ധമാണ്. ഇത് പ്രായോഗികമല്ല. സ്വർണവുമായി വാഹനങ്ങളിൽ കൊണ്ടുപോകുന്ന വിവരങ്ങൾ ചോരാനും കവർച്ചക്കും ഇടയാക്കും. ബിൽ കൈവശമില്ലെന്ന് പറഞ്ഞ് ജി.എസ്.ടി അധികൃതർ നിരന്തരം ജീവനക്കാരെ പീഡിപ്പിക്കുകയാണെന്നും ആരോപിച്ചു. അസോസിയേഷൻ ജില്ല സമ്മേളനം 21ന്​ രാവിലെ 10ന്​ തൃശൂർ ജോയ്സ്​ പാലസ്​ ഹോട്ടലിൽ മന്ത്രി കെ. രാജൻ ഉദ്ഘാടനം ചെയ്യും. പി. ബാലചന്ദ്രൻ എം.എൽ.എ, മേയർ എം.കെ. വർഗീസ് എന്നിവർ പങ്കെടുക്കും. വാർത്തസമ്മേളനത്തിൽ പ്രസിഡന്‍റ്‌ ഷാജു ചിറയത്ത്‌, പി.കെ. രാജേശ്വരൻ, ജെയ്സൺ ആളുകരൻ, ജോഷി പി.ജെ എന്നിവർ പങ്കെടുത്തു.