ആരാധനാലയങ്ങൾ സാംസ്കാരിക കൈമാറ്റ ഇടങ്ങളാവണം -മുഖ്യമന്ത്രി

തൃശൂർ: ക്ഷേത്രങ്ങൾ വെറും ആരാധനാലയങ്ങളല്ല, സാംസ്കാരിക കൈമാറ്റത്തിനുള്ള ഇടങ്ങൾകൂടിയാണെന്ന് മുഖ്യമന്ത്രി പിണറായി വിജയൻ. കൊച്ചിൻ ദേവസ്വം ബോർഡിന്‍റെ ത്രിസപ്തതി ആഘോഷം ഓൺലൈനിലൂടെ ഉദ്ഘാടനം ചെയ്യുകയായിരുന്നു അദ്ദേഹം. നിരവധിയാളുകളുടെ ഉപജീവനവുമായി ബന്ധപ്പെട്ട ഇടങ്ങൾകൂടിയാണ് ആരാധനാലയങ്ങൾ. അവിടത്തെ ജീവനക്കാരെ സംരക്ഷിക്കുന്ന നയമാണ്​ സർക്കാറിന്‍റേതെന്നും മുഖ്യമന്ത്രി പറഞ്ഞു. പ്രകൃതി ദുരന്തങ്ങളും കോവിഡും വരുമാനം കുറച്ചപ്പോൾ സർക്കാർ 203 കോടി രൂപ ക്ഷേത്രങ്ങൾക്ക്​ നൽകി. അമ്പലങ്ങളുടെ നടത്തിപ്പിൽനിന്ന്​ സർക്കാർ മാറിനിൽക്കണമെന്ന് പറയുന്നവർ സർക്കാർ സഹായം ഇല്ലായിരുന്നെങ്കിൽ ക്ഷേത്രങ്ങളുടെ നിത്യനിദാന ചെലവുകളും ജീവനക്കാരുടെ ശമ്പള വിതരണവും ഇത്തരം വിഷമഘട്ടങ്ങളിൽ എങ്ങനെ നടക്കുമെന്ന്​ ആലോചിക്കണം. ക്ഷേത്രങ്ങളുടെ വരുമാനമെടുത്ത്​ സർക്കാർ ചെലവാക്കുകയാണെന്നും അതുകൊണ്ട് വരുമാനം സംരക്ഷിക്കാൻ ക്ഷേത്ര നടത്തിപ്പ്​ വിശ്വാസികളെ ഏൽപിക്കണമെന്നുമാണ് ചിലർ പ്രചരിപ്പിക്കുന്നത്. ഇത് ബോധപൂർവം അവാസ്തവം പ്രചരിപ്പിക്കലാണ്​. കഴിഞ്ഞ സർക്കാറിന്‍റെ കാലത്ത് 1720 കോടി രൂപയാണ് ക്ഷേത്രങ്ങളുടെ അടിസ്ഥാന സൗകര്യ വികസനത്തിനും മറ്റുമായി സർക്കാർ അനുവദിച്ചതെന്നും മുഖ്യമ​ന്ത്രി പറഞ്ഞു. തൃശൂർ കൗസ്തുഭം ഹാളിൽ നടന്ന ചടങ്ങിൽ ബോർഡ്​ പ്രസിഡന്‍റ്​ വി. നന്ദകുമാർ അധ്യക്ഷത വഹിച്ചു. മന്ത്രിമാരായ കെ. രാധാകൃഷ്ണൻ, കെ. രാജൻ, ഡോ. ആർ. ബിന്ദു തുടങ്ങിയവർ പ​ങ്കെടുത്തു.