ദുരിതം ഒഴിയാത...

-മഴക്കെടുതി -ജനറൽ റൗണ്ടപ്​- തൃശൂർ: ബുധനാഴ്ച രാവിലെ മാറിനിന്നെങ്കിലും ഉച്ചയോടെ ജില്ലയിൽ മഴ കനത്തു. കഴിഞ്ഞ ദിവസം ചേറ്റുവയിൽ കടലില്‍ കാണാതായ രണ്ട്​ മത്സ്യത്തൊഴിലാളികളുടെ മൃതദേഹം വൈകീട്ട്​ കണ്ടെത്തി. പുല്ലുവിള സ്വദേശികളായ മണിയൻ, ഗിൽബർട്ട് എന്നിവരാണ് മരിച്ചത്. കോസ്റ്റ് ഗാർഡ് ഹെലികോപ്ടറിൽ നടത്തിയ തിരച്ചിലിൽ രണ്ട് നോട്ടിക്കൽ മൈൽ അകലെയാണ് മൃതദേഹങ്ങൾ കണ്ടെത്തിയത്. ചാലക്കുടിയിൽ മഴയുടെ തിമിർപ്പ്​ കുറഞ്ഞെങ്കിലും പുഴയിലേക്ക്​ വനമേഖലയിൽനിന്നുള്ള മഴയിൽ ജലപ്രവാഹം തുടരുകയാണ്​. അതിരപ്പിള്ളിയിൽ മഴവെള്ളപ്പാച്ചിലിന്‍റെ രൗദ്രത മാറ്റമില്ലാതെ തുടരുകയാണ്​. ചാലക്കുടിപ്പുഴക്കുപുറമെ കുറുമാലി, കരുവന്നൂർ, മണലി പുഴകളിലും കനോലി കനാലും അടക്കം ജലസമൃദ്ധമാണ്​. കഴിഞ്ഞ ദിവസം തുറന്ന പത്തായക്കുണ്ട്​ അണക്കെട്ട്​ ഒഴിച്ച്​ ബാക്കിയുള്ളവ നിരീക്ഷണത്തിലാണ്​. ജില്ലയുടെ തീര, ഇട നാടുകളിൽ വെള്ളക്കെട്ട്​ തുടരുകയാണ്​. മഴമൂലം കഴിഞ്ഞ 24 മണിക്കൂറില്‍ ഭാഗികമായി 13 വീട്​ തകര്‍ന്നു. ചാവക്കാട് ആറ്, തൃശൂര്‍ മൂന്ന്, കൊടുങ്ങല്ലൂര്‍ രണ്ട്, മുകുന്ദപുരത്തും ചാലക്കുടിയിലും ഓരോ വീടുകള്‍ വീതവും തകര്‍ന്നു. ജില്ലയിലെ നാല്​ താലൂക്കിലെ 37 ക്യാമ്പിൽ 444 കുടുംബങ്ങളിൽനിന്നായി 1451പേരുണ്ട്​. ജില്ലയിൽ കടലേറ്റം ഇതുവരെ റിപ്പോർട്ട്​ ചെയ്തിട്ടുമില്ല.