ചികിത്സാ ചെലവ്​ നൽകാൻ ഇ.എസ്​.ഐ കോടതി ഉത്തരവ്​

ചികിത്സ ചെലവ്​ നൽകാൻ ഇ.എസ്​.ഐ കോടതി ഉത്തരവ്​ തൃശൂർ: കാൽമുട്ട്​ മാറ്റിവെക്കൽ ശസ്ത്രക്രിയയുടെ ചെലവ്​ നിഷേധിച്ചതിനെതിരെ നൽകിയ പരാതിയിൽ തൊഴിലാളിക്ക്​ ഇ.എസ്​.ഐ കോടതിയിൽനിന്ന്​ അനുകൂല ഉത്തരവ്​. ഇ.എസ്​.ഐ പദ്ധതിയിൽ അംഗമായ വെണ്ടോർ 'മഡോണ ടൈൽസ്​' തൊഴിലാളി പുതുക്കാട്​ കാഞ്ഞൂർ റോസിക്ക്​ തുക നിഷേധിച്ചതിന്​ ഇ.എസ്​.ഐ കോർപറേഷൻ, അമല ആശുപത്രി, ഇൻഷുറൻസ്​ മെഡിക്കൽ സർവിസസ്​ ഡയറക്ടർ എന്നിവരെ എതിർകക്ഷികളാക്കി ഐ.എൻ.ടി.യു.സി പ്രവർത്തകനായ ജോസ്​ ചാലിശ്ശേരി ഫയൽ ചെയ്ത പരാതിയിലാണ്​ ഉത്തരവ്​. ഇൻഷുറൻസ്​ തുക ലഭിക്കാനുള്ള പെറ്റീഷൻ നടപടികൾക്കിടെ തുക ഭാഗികമായി നൽകി തെറ്റായ വാദങ്ങൾ ഉന്നയിച്ച്​ ഇ.എസ്​.ഐ അധികാരികളും അമല ആശുപത്രിയും 2015 മുതൽ കേസ്​ മുന്നോട്ട് കൊണ്ടുപോകുകയായിരുന്നു​വെന്ന്​ കോടതി നിരീക്ഷിച്ചു. ശസ്ത്രക്രിയക്ക്​ മുൻകൂർ അനുമതിയില്ലെന്നും അവർ വാദിച്ചു. ചികിത്സ ചെലവ്​ കുറക്കാനാവില്ലെന്ന്​ മുൻ വിധികൾ ഉദ്ധരിച്ച്​ വ്യക്തമാക്കിയ കോടതി ചെലവ്​ പൂർണമായും ഏഴുശതമാനം പലിശയും 15,000 രൂപ കോടതി ചെലവും സഹിതം നൽകാൻ ഉത്തരവിട്ടു. മൂന്ന്​ എതിർകക്ഷികളും കോടതി ചെലവ്​ തുല്യമായി വഹിക്കണം. ഒരുമാസത്തിനകം ഉത്തരവ്​ നടപ്പാക്കണമെന്നും ഇ.എസ്​.ഐ കോടതി ജഡ്​ജി ആർ. ശ്രീവത്സൻ ഉത്തരവിൽ ആവശ്യപ്പെട്ടു.