റേഷൻ വാഹന നിരീക്ഷണം: പദ്ധതി തകർക്കാൻ ഉദ്യോഗസ്ഥ-മാഫിയ കൂട്ടുകെട്ട്​

തൃശൂർ: റേഷൻ ഭക്ഷ്യധാന്യ ശേഖരണ-വിതരണ വാഹനങ്ങൾ നിരീക്ഷിക്കുന്നതിന്​ ഏർപ്പെടുത്തിയ വെഹിക്കിൾ ട്രാക്കിങ്​​ ആൻഡ്​ ഫ്ലീറ്റ്​ മാനേജ്​മെന്‍റ്​ സംവിധാനം (വി.ടി.എഫ്​.എം.എസ്​) പൊളിച്ചടുക്കാൻ ഉദ്യോഗസ്ഥ-മാഫിയ ശ്രമം. ജി.പി.എസ്​ ഘടിപ്പിക്കലിന്‍റെ​ മൂന്നാംവട്ട ഉദ്​ഘാടനം നടന്നത്​ കഴിഞ്ഞ ഏപ്രിൽ 28നാണ്​. മേയ്​ 31നകം നടപടി പൂർത്തിയാക്കി വിതരണ വാഹനങ്ങളുടെ വരവും പോക്കും സുതാര്യമാക്കുമെന്നായിരുന്നു സപ്ലൈ​കോയുടെ അവകാശവാദം. എഫ്​.സി.ഐ, സ്വകാര്യമില്ലുകളിൽ നിന്നും റേഷൻ വസ്തുക്കൾ എൻ.എഫ്​.എസ്​.എ ഗോഡൗണുകളിൽ എത്തിക്കുന്ന വാഹനങ്ങളാണ്​ ആദ്യഘട്ടത്തിൽ നിരീക്ഷണത്തിലാക്കുന്നത്​. പിന്നാലെ ഗോഡൗണുകളിൽ നിന്നും റേഷൻകടകളിലേക്ക്​ വാതിൽപടി വിതരണ കരാറുകളിൽ ഏർപ്പെട്ട വാഹനങ്ങളിലും ഇവ ഒരുക്കുമെന്നും അറിയിച്ചു. ജൂൺ ഒന്നു മുതൽ കൃത്യമായ നിരീക്ഷണത്തിലാവും വിതരണം നടത്തുകയെന്നും സപ്ലൈ​കോ സി.എം.ഡി എ.ഡി.ജി.പി ഡോ. സഞ്ജീവ് കുമാർ പട്‌ജോഷി വ്യക്തമാക്കിയിരുന്നു. എന്നാൽ റൂട്ട്​മാപ്പ്​ ഇതുവരെ തയാറാക്കാനായിട്ടില്ല. ഉ​ദ്യോഗസ്ഥ വീഴ്​ച​ക്ക്​ എതിരെ അച്ചടക്ക നടപടിയുമായി രംഗത്തു വന്നിരിക്കുകയാണ്​ സപ്ലൈ​കോ. ഒപ്പം യുദ്ധകാലാടിസ്ഥാനത്തിൽ ഇത്​ തയാറാക്കുവാനും ആവശ്യപ്പെട്ടിട്ടുണ്ട്​. തുടർന്ന്​ ഇത്​ വി.ടി.എഫ്​.എം.എസ് സോഫ്​റ്റ്​വെയറിൽ മാപ്പ്​ ചെയ്തുവെന്ന്​ സത്യവാങ്മൂലം നടത്തുവാനും നിർദേശമുണ്ട്​. നടപടി പൂർത്തിയാക്കാത്ത ഉദ്യോഗസ്ഥർക്ക്​ എതിരെ കർശന നടപടിയാണ്​ ശിപാർശ ചെയ്തിരിക്കുന്നത്​. എ.എസ്​ 140 ഉപകരണമാണ്​ വാഹനനിരീക്ഷണത്തിനായി ഉപയോഗിക്കുന്നത്​. കരാർ വാഹനങ്ങൾ കടന്നുപോകുന്ന മുഖ്യ റോഡുകളും ഉപറോഡുകളും അടക്കം ഇതിലൂടെ​ നിരീക്ഷിക്കാനാവും. ഗൂഗിൾമാപ്പ്​ ഉപയോഗിച്ച്​ തയാറാക്കിയ റൂട്ട്​മാപ്പ്​ താലൂക്ക്​ റേഷനിങ്​ ഇൻസ്​പെക്ടർമാർ പരിശോധിക്കണമെന്നായിരുന്നു നിർദേശം​. ഇതുകൂടാതെ അമിത ലോഡ്​, വാഹനങ്ങൾ വഴിക്കിടെ മാറൽ, റോഡ്​മാറി പോകൽ അടക്കം നിരീക്ഷിക്കാനാവും. റേഷൻ വസ്തുക്കൾ കരിഞ്ചന്തയിലേക്ക്​ പോകുന്നതും ഗോഡൗണുകളിൽ അമിത സ്റ്റോക്ക്​ അടക്കം കണ്ടെത്തിയിട്ടും ഉദ്യോഗസ്ഥ അലംഭാവമാണ്​ ജി.പി.എസ്​ ഒരുക്കുന്നത്​ നീണ്ടുപോകാൻ കാരണം.