ഏഴരക്കൂട്ടം വാർഷിക സമ്മേളനം നാളെ

തൃശൂർ: 'ഏഴരക്കൂട്ട'ത്തിന്‍റെ സ്ഥാപക പ്രസിഡന്റ് പോൾ കോനിക്കര ചരമ വാർഷിക അനുസ്മരണവും ഏഴരക്കൂട്ടം വാർഷിക സമ്മേളനവും ഞായറാഴ്ച​ വൈകീട്ട്​ മൂന്നിന്​ സാഹിത്യ അക്കാദമി ഹാളിൽ നടക്കുമെന്ന്​ ഭാരവാഹികൾ വാർത്തസമ്മേളനത്തിൽ അറിയിച്ചു. മന്ത്രി കെ. രാജൻ ഉദ്ഘാടനം ചെയ്യും. മേയർ എം.കെ. വർഗീസ് അധ്യക്ഷത വഹിക്കും. മന്ത്രി ആർ. ബിന്ദു സേവന വസ്തുക്കളുടെ വിതരണോദ്ഘാടനം നിർവഹിക്കും. മന്ത്രി കെ. രാധാകൃഷ്ണൻ പോൾ കോനിക്കരയെയും ഭാര്യ റോസിലി പോളിനെയും അനുസ്മരിക്കും. ചികിത്സാ-ഭവന നിർമാണ സഹായം, ഭക്ഷ്യക്കിറ്റ്, വസ്ത്രം, പഠനോപകരണങ്ങൾ, തയ്യൽ മെഷീൻ, ടി.വി സെറ്റ് എന്നിവയുടെ വിതരണവും നടക്കുമെന്ന് പ്രോഗ്രാം ജനറൽ കൺവീനർ പ്രശാന്ത് മേനോൻ, പ്രസിഡന്റ് വി.ജി. സുരേഷ്ബാബു, സെക്രട്ടറി കെ.ഡി. യേശുദാസ് എന്നിവർ പറഞ്ഞു.