വിദ്യാഭ്യാസ ഓഫിസുകളിൽ മിന്നൽ പരിശോധന

തൃശൂർ: തൃശൂർ ജില്ല വിദ്യാഭ്യാസ ഓഫിസ്​, വടക്കാഞ്ചേരി, ചേർപ്പ്​ ഉപജില്ല വിദ്യാഭ്യാസ ഓഫിസുകൾ എന്നിവിടങ്ങളിൽ 'ഓപറേഷൻ ജ്യോതി' പേരിൽ സംസ്ഥാന വിജിലൻസ് മിന്നൽ പരിശോധന നടത്തി. എയ്​ഡഡ്​ സ്കൂൾ അധ്യാപക, അനധ്യാപക നിയമനവുമായി ബന്ധപ്പെട്ട സെക്ഷനുകളിൽ വ്യാപക അഴിമതി നടക്കു​ന്നുവെന്ന വിവരത്തിന്‍റെ അടിസ്ഥാനത്തിൽ സംസ്ഥാന വ്യാപകമായായിരുന്നു മിന്നൽ പരിശോധന നടത്തിയത്​. ചെറിയ ക്രമക്കേടുകൾ മാത്രമാണ്​ കണ്ടെത്താനായതെന്ന്​ വിജിലൻസ്​ വൃത്തങ്ങൾ അറിയിച്ചു. കൂടുതലായും ഓഫിസ്​ രജിസ്റ്റർ സൂക്ഷിക്കുന്നതുമായി ബന്ധപ്പെട്ട ക്രമക്കേടായിരുന്നു. അധ്യാപക നിയമത്തിന്​ പുറമെ സ്കൂളുകളിലേക്ക്​ നൽകുന്ന ഗ്രാന്‍റ്​, ഇൻക്രിമെന്‍റ്​ അനുവദിക്കുന്നത്​, പി.എഫ്​ രജിസ്റ്റർ, കാഷ്​ ഡിക്ലറേഷൻ എന്നീ കണക്കുകളിലായിരുന്നു കൂടുതൽ പരിശോധന. വെള്ളിയാഴ്ച രാവിലെ 11 മുതൽ തുടങ്ങിയ പരിശോധന വൈകീട്ടുവരെ നീണ്ടു.