ഡിവൈ.എസ്.പിക്ക് മഹല്ല് ഭാരവാഹികൾ പരാതി നൽകി

അന്തിക്കാട്: അന്തിക്കാട് മഹല്ല് ഖതീബ് ആയിരിക്കെ പോക്സോ കേസിൽ പ്രതി ചേർക്കപ്പെട്ട്​ ഒളിവിൽപോയ കരൂപ്പടന്ന കുഴിക്കണ്ടത്തിൽ ബഷീർ സഖാഫിയെ പിടികൂടാൻ ഊർജിതമായ അന്വേഷണം ആവശ്യപ്പെട്ട് പുതിയ കമ്മിറ്റി ഭാരവാഹികൾ ഇരിങ്ങാലക്കുട ഡിവൈ.എസ്.പിക്ക് നിവേദനം നൽകി. അന്തിക്കാട് എസ്.എച്ച്.ഒ അനീഷ് കരീമിന്‍റെ നേതൃത്വത്തിൽ പ്രത്യേക സംഘം കേസ്​ അന്വേഷിക്കുന്നതായും പിടികൂടാൻ എല്ലാ മാർഗങ്ങളും തേടുന്നതായും ഡിവൈ.എസ്.പി ബാബു തോമസ് ഉറപ്പുനൽകിയതായി നിവേദക സംഘം അറിയിച്ചു. മഹല്ല് പ്രസിഡന്‍റ്​ അബ്ദുൽ നാസർ പതിപറമ്പത്ത്, സെക്രട്ടറി കെ.കെ. അബ്ദുസ്സലാം, വൈസ് പ്രസിഡന്‍റ്​ അബ്ബാസ് വീരാവുണ്ണി, ജോയന്‍റ്​ സെക്രട്ടറി റാഫി കുഞ്ഞിക്ക എന്നിവരാണ് ഇരിങ്ങാലക്കുടയിലെ ഡിവൈ.എസ്.പി ഓഫിസിലെത്തി നിവേദനം നൽകിയത്. മേയ് 18നാണ്​ 14കാരനെ പ്രകൃതി വിരുദ്ധ പീഡനത്തിന്​ ഇരയാക്കിയ കേസിൽ പള്ളി ഇമാമിനെതിരെ പോക്സോ ചുമത്തി പൊലീസ് കേസെടുത്തത്​. തുടർന്ന്​ ഇയാൾ ഒളിവിൽപോയി. തുടർന്ന്​ അന്തിക്കാട് മഹല്ലിൽ വലിയ പ്രതിഷേധം ഉയർന്നിരുന്നു. ഇക്കഴിഞ്ഞ്​ 12ന് പൊലീസ് സുരക്ഷയിൽ ചേർന്ന പൊതുയോഗത്തിൽ പുതിയ ഭരണസമിതിയെ തെരഞ്ഞെടുത്തിരുന്നു.