പൊലീസിന്‍റെ ജാഗ്രത; മോഷണം പോയ രണ്ട് വാഹനങ്ങൾ കണ്ടെത്തി

തൃശൂർ: വഴിയരികിൽ ദിവസങ്ങളായി നിർത്തിയിട്ട ഇരുചക്ര വാഹനങ്ങൾ മോഷ്ടിച്ചതാണെന്ന്​ കണ്ടെത്തി. തൃശൂർ ട്രാഫിക് പൊലീസ് സ്റ്റേഷനിലെ സിവിൽ പൊലീസ് ഓഫിസർ ശരത്താണ് കഴിഞ്ഞ ദിവസം നടത്തിയ പട്രോളിങ്ങിനിടെ കൊക്കാലെ മുസ്ലിം പള്ളിക്ക് സമീപം ബൈക്ക് നിർത്തിയിട്ടത്​ കണ്ടത്. സമീപത്തെ കടകളിൽ അന്വേഷിച്ചപ്പോൾ ദിവസങ്ങളായി ഇവിടെയുണ്ടെന്നും ഉടമസ്ഥൻ ആരാണെന്ന്​​ അറിയില്ലെന്നുമായിരുന്നു മറുപടി. മറ്റൊരു വാഹനം കണ്ടെത്തിയത്​ മണ്ണുത്തി മേൽപ്പാലത്തിന് താഴെയാണ്​. ഇവിടെ സ്കൂട്ടർ നിർത്തിയിട്ടിരിക്കുന്നത്​ ഒല്ലൂർ പൊലീസ് സ്റ്റേഷനിലെ സിവിൽ പൊലീസ് ഓഫിസർ നിധീഷിന്‍റെ ശ്രദ്ധയിലാണ് പെട്ടത്. രണ്ടു സംഭവങ്ങളിലും പൊലീസുദ്യോഗസ്ഥർക്ക് സംശയം തോന്നി. വാഹനങ്ങളുടെ രജിസ്ട്രേഷൻ നമ്പർ പരിശോധിച്ചു. ആർ.ടി.ഒ ഓഫിസുമായി ബന്ധപ്പെട്ട് ഉടമസ്ഥരെ കണ്ടെത്തി. ഈ വാഹനങ്ങൾ മോഷ്ടിച്ചശേഷം ഉപേക്ഷിച്ചുപോയതാണെന്ന് മനസ്സിലായി. കൊക്കാലെയിൽ കണ്ടെത്തിയ വാഹനം ഏതാനും മാസങ്ങൾക്ക്​ മുമ്പ് കാട്ടൂരിൽനിന്നു മോഷണം നടത്തിയ ബൈക്കാണ്​. മണ്ണുത്തിയിലേത്​ ആഴ്ചകൾക്ക്​ മുമ്പ്​ പത്തനംതിട്ട അടൂരിൽനിന്നു മോഷ്ടിക്കപ്പെട്ടതാണ്​. വാഹന ഉടമകൾ ടൗൺ ഈസ്റ്റ്, മണ്ണുത്തി പൊലീസ് സ്റ്റേഷനുകളിലെത്തി രേഖകൾ ഹാജരാക്കി വാഹനം ഏറ്റുവാങ്ങി. ഉടമസ്ഥരെ കണ്ടെത്തിയതിന്​ ഇരു പൊലീസുകാരെയും കമീഷണർ ആർ. ആദിത്യ അഭിനന്ദിച്ചു.