വിദ്യാർഥിയുടെ കൈയിലൂടെ ബസിന്‍റെ പിൻചക്രം കയറിയിറങ്ങി

മതിലകം: ദേശീയപാത മതിലകം പള്ളി വളവിൽ സ്കൂൾ വിദ്യാർഥിയുടെ കൈയിലൂടെ സ്വകാര്യ ബസിന്‍റെ പിൻചക്രം കയറിയിറങ്ങി. മതിലകം സെന്‍റ്​ ജോസഫ്സ് ഹയർ സെക്കൻഡറി സ്കൂളിന് മുമ്പിൽ ബുധനാഴ്ച രാവിലെ 9.20നാണ്​ സംഭവം. മതിലകം സെന്‍റ്​ ജോസഫ് സ്‌കൂൾ ഏഴാം ക്ലാസ് വിദ്യാർഥി കൂളിമുട്ടം തറയിൽ മണിലാലിന്‍റെ മകൻ അലനാണ്​ (12) പരിക്കേറ്റത്. ഗുരുതര പരിക്കേറ്റ വിദ്യാർഥിയെ ആക്ട്സ് പ്രവർത്തകർ ആദ്യം കൊടുങ്ങല്ലൂർ മോഡേൺ ആശുപത്രിയിലും പിന്നീട് തൃശൂർ ജൂബിലി ആശുപത്രിയിലും പ്രവേശിപ്പിച്ചു. വീട്ടിൽനിന്നു സ്‌കൂളിലേക്ക് സൈക്കിളിൽ വരുന്നതിനിടെയാണ്​ അപകടം. കൊടുങ്ങല്ലൂരിലേക്ക് വന്ന ബസ് അലൻ സഞ്ചരിച്ച സൈക്കിളിൽ തട്ടി. സൈക്കിളിൽനിന്നു റോഡിലേക്ക് വീണ അലന്‍റെ കൈയിലൂടെ ബസിന്‍റെ പിൻചക്രം കയറിയിറങ്ങുകയായിരുന്നു. മതിലകം പൊലീസ് മേൽനടപടി സ്വീകരിച്ചു.