കാലവർഷം: സാഹചര്യം അതിതീവ്രം; ഒരുങ്ങാതെ കേരളം

തൃശൂർ: കാലാവസ്ഥപ്രതിഭാസങ്ങൾ അതിതീവ്ര സ്വഭാവം പ്രകടിപ്പിച്ച്​ കാലവർഷം ഇങ്ങെത്തിയിട്ടും കേരളത്തിൽ മുന്നൊരുക്കമില്ല. 2018നെക്കാൾ പ്രളയാനുകൂല സാഹചര്യത്തിലും മഴക്കാല പൂർവശുചീകരണംപോലും പലയിടത്തും തുടങ്ങിയിട്ടില്ല. 2018ൽ മാർച്ച്​ മുതൽ മേയ് ​വരെ വേനൽമഴ ലഭിച്ചത്​ 521 മില്ലിമീറ്ററാണ്​. ഈ വർഷം ഈ മാസം ഇതുവരെ 598 മി.മീ. മഴ കേരളത്തിന്​ ലഭിച്ചുകഴിഞ്ഞു. കണക്കുകൾ പരിശോധിച്ചാൽ മേയിൽ 2018ൽ 354 മി.മീ. മഴയാണ്​ ലഭിച്ചതെങ്കിൽ ഈ മാസം ഇതുവരെ 355 മി.മീ. മഴ ലഭിച്ചുകഴിഞ്ഞു. 2018 ഏപ്രിലിൽ 112 മി.മീ. മഴയാണ്​ ലഭിച്ചതെങ്കിൽ ഈ ഏപ്രിലിൽ 196 മി.മീ. ലഭിച്ചു. 2018ൽ കാലവർഷത്തിനുമുമ്പ്​ ജനുവരി മുതൽ മേയ്​ വരെ ലഭിച്ചത്​ 537 മി.മീ. മഴയാണ്​. ഈ വർഷം ഇതുവരെ 615 മി.മീ. മഴ ലഭിച്ചു. മാസം അവസാനിക്കാൻ ഇനിയും അഞ്ചുദിവസം ശേഷിക്കേ കൂടുതൽ മഴ ലഭിക്കുകയും ചെയ്യും. അതേസമയം, ഭൂഗർഭ ജലവിതാനം ഏതാണ്ട്​ നിറഞ്ഞുകവിഞ്ഞ രീതിയിലാണ്​. അതുകൊണ്ടുതന്നെ കൂടുതൽ ജലം ഭൂമിയിലേക്ക്​ ഊർന്നിറങ്ങാനാവാത്ത സ്ഥിതിവിശേഷമാണുള്ളത്​. കേരളത്തിലെ നദികളും ഡാമുകളും ജലനിബിഡവുമാണ്​. ജലസ്രോതസ്സുകളുടെ ശുചീകരണം ഇതുവരെ നടന്നിട്ടില്ല. 2018ൽ പ്രളയത്തിന്​ പിന്നാലെ നദികളും കനാലുകളും ഡാമുകളും അടക്കം ശുചീകരിക്കാൻ സർക്കാർ പദ്ധതി തയാറാക്കിയിരുന്നു. ഇതുവരെ ഇവയൊന്നും പൂർത്തീകരിക്കാനായിട്ടില്ല. മൺസൂൺ കാറ്റ്​ സജീവമാകുന്നതോടെ നിലവിൽ ശാന്തമായ കടലും കലുഷിതമാവുന്ന സാഹചര്യം ഉണ്ടാവും. ഇതോടെ തീരവും ബുദ്ധിമുട്ടിലാവും. കുറഞ്ഞ മഴ ലഭിച്ചാൽപോലും ഉണ്ടാവുന്ന വെള്ളക്കെട്ട്​ കാര്യങ്ങൾ കുഴക്കും. 23 ശതമാനം മാത്രം കൂടുതൽ മഴ ലഭിച്ച 2018ലാണ്​ കേരളം മഹാപ്രളയത്തിൽ അകപ്പെട്ടത്​. അന്ന്​ കാലവർഷത്തിൽ ആദ്യപാതിയിൽ കുറഞ്ഞും പിന്നീട്​ തിമിർത്ത്​ അതിതീവ്ര സ്വഭാവം പ്രകടമാക്കുകയായിരുന്നു. ഇക്കുറി തെക്കേ ഇന്ത്യൻ സംസ്ഥാനങ്ങളിൽ നേരിയ മഴക്കുറവാണ്​ കേന്ദ്ര കാലാവസ്ഥ വകുപ്പ്​ നിരീക്ഷിക്കുന്നത്​. അതേസമയം, കഴിഞ്ഞ കുറച്ചു വർഷങ്ങളായുള്ള മഴയുടെ വിതരണത്തിലെ പാളിച്ചകൾ കേരളത്തെ ബാധിക്കും. രണ്ടുദിവസത്തിനകം കാലവർഷം ഇങ്ങ്​ എത്തവേ അനുഭവങ്ങളിൽനിന്ന്​ ഇനിയും പാഠം പഠിക്കാൻ തയാറായില്ലേൽ കാര്യങ്ങൾ കൈവിട്ടു പോകാനിടയുണ്ട്​.