പുലിയുടെ രൂപസാദൃശ്യമുള്ള ജീവിയെ കണ്ടത് ഭീതി പരത്തി

പന്തളം: പുലിയുടെ രൂപസാദൃശ്യമുള്ള ജീവിയെ കണ്ടത് നാട്ടുകാരിൽ ഭീതി പരത്തി. ചൊവ്വാഴ്ച രാത്രിയോടെ ചേരിക്കൽ മന്നം ആയുർവേദ കോളജ് പരിസരത്താണ് ജീവിയെ പരിസരവാസികൾ കണ്ടത്. സംഘടിച്ച നാട്ടുകാർ തിരച്ചിൽ നടത്തിയെങ്കിലും കണ്ടെത്താൻ കഴിഞ്ഞില്ല.

ബുധനാഴ്ച രാവിലെയും സംഭവസ്ഥലത്ത് നാട്ടുകാർ തിരച്ചിൽ നടത്തിയിരുന്നു. വിശാലമായ കരിങ്ങാലി പുഞ്ചക്കരിയിലാണ് ഈ പ്രദേശം. കാട്ടുപൂച്ചയാകാമെന്ന് കരുതുന്നു. എന്നാൽ, ഇത്തരത്തിൽ ഒരു ജീവിയെ കണ്ടതായി ഒരു വിവരവും ലഭിച്ചിട്ടില്ലെന്ന് റാന്നി ഫോറസ്റ്റ് ഓഫിസ് അധികൃതർ അറിയിച്ചു.