വീടി​െൻറ മുറ്റവും സംരക്ഷണഭിത്തിയും ഇടിഞ്ഞു; ഗൃഹനാഥൻ 15 അടി താഴ്​ചയിലേക്ക്​ വീണു

റാന്നി (പത്തനംതിട്ട): കനത്ത മഴയിൽ വീടി​െൻറ സംരക്ഷണഭിത്തിയും മുറ്റവും ഇടിഞ്ഞുവീണു. ഗൃഹനാഥൻ പരിക്കുകളോടെ അത്ഭുതകരമായി രക്ഷപ്പെട്ടു. ശനിയാഴ്ച രാത്രി ഏഴരയോടെ റാന്നി തെക്കേപ്പുറം തെക്കേതിൽ റെജി (55) ആണ് അപകടത്തിൽപ്പെട്ടത്. സംരക്ഷണഭിത്തി ഇടിഞ്ഞതിനെ തുടർന്ന് വീടിനും ബലക്ഷയമായി.

റെജി വീടി​െൻറ മുൻവശത്തെ കൈപ്പടയിൽ ഇരിക്കുകയായിരുന്നു. വലിയ ശബ്ദം കേട്ട് മകൻ റിജോ എത്തിയപ്പോൾ പിതാവ് പതിനഞ്ചടിയോളം താഴ്ചയിൽ വീണുകിടക്കുന്നതാണ് കണ്ടത്. ഉടനെ ആശുപത്രിയിൽ എത്തിച്ച് പ്രാഥമിക ശുശ്രൂഷ നൽകി വിട്ടയച്ചു. വാർഡ് അംഗം പ്രകാശ് കുഴികാലയും റവന്യൂ സംഘവും സംഭവസ്ഥലം സന്ദർശിച്ചു.