പത്തനംതിട്ട ജില്ലാ കലോത്സവം: 18ാം വർഷവും ശ്രീ വിജയാനന്ദ ഗുരുകുല വിദ്യാപീഠം വിജയാനന്ദത്തിൽ

കിടങ്ങന്നൂർ: 2004 മുതൽ തുടർച്ചയായി പത്തനംതിട്ട ജില്ലാ കലോത്സവത്തിൽ വെന്നിക്കൊടി പാറിക്കുന്ന കിടങ്ങന്നൂർ ശ്രീ വിജയാനന്ദ ഗുരുകുല വിദ്യാപീഠം ഹയർസെക്കൻഡറി സ്കൂളിന്‍റെ പേരിൽ തന്നെയുണ്ട്​ വിജയിക്കാനുള്ള അടങ്ങാത്ത ആ​വേശം. അവർ ഈ വർഷവും കപ്പ്​ ആർക്കും വിട്ട്​ നൽകിയില്ല. തുടർച്ചയായ 18 വർഷമായി ജില്ലാ സ്കൂൾ കലാമേളയിൽ സ്കൂൾ തലത്തിൽ ഒന്നാമതാണ്​ അവർ.​ 302 പോയിന്‍റാണ്​ വിജയാനന്ദ ഇക്കുറി തിരുമൂലപുരത്ത്​ നടന്ന മേളയിൽ അടിച്ചെടുത്തത്​. കപ്പ്​ കൈവിടാത്തതിന്‍റെ പിന്നിലെ രഹസ്യം എന്താണെന്ന്​ അറിയാൻ എല്ലാവർക്കും താൽപര്യം കാണും. അത്​ ഒന്നുമില്ല. കഷ്ടപ്പാട്​തന്നെ അതായത്​ തുടർച്ചയായ പരിശീലനമെന്ന്​ പ്രധാനാധ്യാപിക എസ്​. മായാലക്ഷ്മി പറയുന്നു. ''അധ്യയന വർഷാരംഭം തന്നെ കലോത്സവത്തിന്​ തയ്യാറെടുപ്പുകൾ തുടങ്ങും.

കിട്ടാവുന്നതിൽ മികച്ച പരിശീലകരെ കണ്ടെത്തും. കലാവാസനയുള്ള കുട്ടികളെ സംഗീത അധ്യാപികയായിരുന്ന സുശീല​ കണ്ടെത്തി ആദ്യഘട്ട പരിശീലനം നൽകുന്നത്​. പരമ്പരാഗത കലാരൂപങ്ങളായ പൂരക്കളി, പഞ്ചവാദ്യം, വഞ്ചിപ്പാട്ട് തുടങ്ങി തിരുവാതിര, മാർഗ്ഗം കളി, സംഘനൃത്തം സംഘഗാനം എന്നിവക്ക് കേരളത്തിലെ തന്നെ പ്രമുഖരായ ഗുരുക്കൻമാർ പരിശീലനം നൽകുന്നു. പൂർവ വിദ്യാർഥികളായ ചിലരും പരിശീലകരായുണ്ട്​. കലാമേളയിൽ എല്ലാ ഇനങ്ങൾക്കും തങ്ങളുടെ കുട്ടികളെ പ​ങ്കെടുപ്പിക്കാൻ ​വിദ്യാപീഠം പ്രത്യേകം താൽപര്യം കാണിക്കും. ചിട്ടയായ പരിശീലനവും കഠിനാധ്വാനവും കലോൽസവ വിജയം മാത്രമല്ല കുട്ടികൾക്ക് നൽകുന്നത് പരസ്പര ബഹുമാനവും സഹിഷ്ണുതയും കൂടിയാണ്''.

ഗ്രൂപ്പിനങ്ങൾക്ക് പുറമെ വ്യക്തിഗത ഇനങ്ങൾക്കും പ്രാധാന്യം നൽകുന്നുണ്ട്​. ഇതിന് പുറമെ അക്ഷരശ്ലോകം കാവ്യകേളി പദ്യപാരായണം മലയാളത്തിന് പുറമെ ഉറുദു, കന്നട, തമിഴ് തുടങ്ങിയവക്ക് ഇവിടുത്തെ തന്നെ അധ്യാപകർ പരിശീലനം നൽകുന്നു.

ആറന്മുള ഉപജില്ലയുടെ കീഴിലെ സ്കൂൾ 18 വർഷമായി പത്തനംതിട്ട ജില്ലയെ പ്രതിനിധീകരിച്ച് പൂരക്കളി സംസ്ഥാനതലത്തിൽ അവതരിപ്പിച്ച്​ വരുന്നു. 2019ലെ കാസർഗോഡ് സംസ്ഥാന കലോത്സവത്തിൽ സ്കൂൾ മൂന്നാം സ്ഥാനത്തെത്തി. മുമ്പ്​ ഹയർ സെക്കൻഡറി വിഭാഗത്തിൽ ഒന്നും രണ്ടും സ്ഥാനങ്ങളും നേടിയിരുന്നു. സ്കൂൾ മാനേജ്‌മെന്റും അധ്യാപക രക്ഷകർതൃ സംഘടനയും പൂർവ്വവിദ്യാർത്ഥികളും എല്ലാ സഹായങ്ങളുമായി തങ്ങളുടെ ഒപ്പമുണ്ടെന്ന ധൈര്യമാണ്​ ഇവിടുത്തെ ഓരോ വിദ്യാർഥിയെയും നയിക്കുന്നത്​.