കുട്ടിയെ തട്ടിക്കൊണ്ടുപോകാൻ ശ്രമിച്ച നാടോടി സ്ത്രീ അറസ്റ്റിൽ

അടൂർ: ഇളമണ്ണൂർ സ്വദേശികളുടെ മൂന്നേകാൽ വയസ്സുള്ള മകനെ തട്ടിക്കൊണ്ടുപോകാൻ ശ്രമിച്ച നാടോടി സ്ത്രീയെ അടൂർ പൊലീസ് അറസ്റ്റ് ചെയ്തു. തമിഴ്നാട് വെല്ലൂർ ജില്ലയിൽ മഞ്ചു (40) ആണ് അറസ്റ്റിലായത്.

വ്യാഴാഴ്ച രാവിലെ 9.30നാണ് സംഭവം. അമ്മ വീടിനുള്ളിലും അച്ഛൻ വീടിനോടുചേർന്ന വർക്ഷോപ്പിലും നിൽക്കവെ സിറ്റ്ഔട്ടിൽ കളിച്ചുകൊണ്ടിരുന്ന കുട്ടിയെ തട്ടിയെടുത്ത് ഓടി രക്ഷപ്പെടാൻ ശ്രമിക്കുകയായിരുന്നു നാടോടി സ്ത്രീ. ഇതുകണ്ട മാതാപിതാക്കളും നാട്ടുകാരും ചേർന്ന് സ്ത്രീയെ തടഞ്ഞുവെച്ച് പൊലീസിൽ ഏൽപിക്കുകയായിരുന്നു.

നാടോടി സ്ത്രീ സംസ്ഥാനത്തിനകത്തോ പുറത്തോ സമാന സ്വഭാവമുള്ള കുറ്റകൃത്യങ്ങളിൽ ഉൾപ്പെട്ടിട്ടുണ്ടോയെന്നുള്ള വിവരം പരിശോധിച്ചുവരുകയാണ്. അടൂർ സി.ഐ ടി.ഡി. പ്രജീഷ്, എസ്.ഐ കെ.എസ്. ധന്യ എന്നിവരുടെ നേതൃത്വത്തിലായിരുന്നു അറസ്റ്റ്.