കാട്ടുപന്നിയുടെ ആക്രമണം; യുവാവിന്‍റെ കാലൊടിഞ്ഞു

അടൂർ: തെങ്ങമത്ത് കാട്ടുപന്നി ശല്യം രൂക്ഷം. രാത്രിയിൽ മുറ്റത്തിറങ്ങിയ യുവാവിനെ പന്നി കുത്തി വീഴ്ത്തി. ഇയാളുടെ കാലൊടിഞ്ഞു.തെങ്ങമം പുഷ്പാലയത്തിൽ പ്രമോദിനെയാണ് പന്നി കുത്തിയത്. കൃഷിയിടങ്ങളിൽ പന്നിശല്യം രൂക്ഷമാണ്. ദിനം തോറും ആയിരക്കണക്കിന് രൂപയുടെ നാശനഷ്ടമാണ് കൃഷിയിടങ്ങളിൽ ഉണ്ടാകുന്നത്.

മുറ്റത്തെ കൃഷിയിടത്തിൽ ഉണ്ടായിരുന്ന പന്നി ആളിനെ കണ്ട് ഓടിവന്ന് ഇടിച്ച് മറിച്ചിടുകയായിരുന്നെന്നും കാലിൽ ചവിട്ടിയതിനാലാണ് ഒടിഞ്ഞതെന്നും പ്രമോദ് പറഞ്ഞു. അടൂർ ഗവ: ആശുപത്രിയിൽ ചികിത്സ തേടിയ പ്രമോദ് ഇപ്പോൾ വീട്ടിൽ വിശ്രമത്തിലാണ്.