31 വര്‍ഷമായി കാല്‍നടയായി ശബരിമലക്ക്​

ശബരിമല: കാനനവാസനെ ദര്‍ശിക്കുന്നതിന് കായംകുളത്തുനിന്ന് 31 വര്‍ഷമായി കാല്‍നടയായി ശബരിമല സന്നിധാനത്ത് എത്തുന്ന തീര്‍ഥാടക സംഘം ഇപ്രാവശ്യവും പതിവ് തെറ്റിച്ചില്ല. ഇത്തവണ 100ഓളം പേരാണ് സംഘത്തിലുള്ളത്. കോവിഡ് കാലത്തിന് മുമ്പ് വരുമ്പോള്‍ 200 തീര്‍ഥാടകരായിരുന്നു ഈ സംഘത്തില്‍ ഉണ്ടായിരുന്നത്. കായംകുളം തീര്‍ഥം പൊഴിച്ചാലുംമൂട് അമ്മന്‍കോവിലില്‍നിന്ന് മാലയിട്ട് 41 ദിവസത്തെ വ്രതവും മറ്റ് അനുഷ്ഠാനങ്ങളും നടത്തിയാണ് എല്ലാ വര്‍ഷവും തീര്‍ഥാടക സംഘം എത്തുന്നത്. ബാബു കോയിപുറത്താണ് ഗുരുസ്വാമി. എട്ട് മുതല്‍ 78 വയസ്സുള്ളവര്‍ വരെ തീര്‍ഥാടക സംഘത്തിലുണ്ട്.