വ്യാജ ഫോൺകാൾ: മേപ്രാൽ സ്വദേശിക്ക് നഷ്​ടമായത് 25,000 രൂപ

തിരുവല്ല: ബാങ്കിൽനിന്നെന്ന വ്യാജേനയെത്തിയ ഫോൺ കോളിൽ മേപ്രാൽ സ്വദേശിക്ക് നഷ്​ടമായത് 25,000 രൂപ. മേപ്രാൽ ചെമ്പോലിൽ വീട്ടിൽ സഖറിയ മാത്യുവിനാണ് പണം നഷ്​ടമായത്. എസ്.ബി.ഐയിൽ നിന്നെന്ന വ്യാജേനയാണ് ഇദ്ദേഹത്തി​ൻെറ വീട്ടിലെ ലാൻഡ്​ ഫോണിലേക്ക് വിളി വന്നത്. ആദ്യം ഇംഗ്ലീഷിലും പിന്നീട് മലയാളത്തിലുമാണ് സംസാരിച്ചത്. ഇദ്ദേഹത്തി​ൻെറ എ.ടി.എം കാർഡി​ൻെറ കാലാവധി കഴിഞ്ഞിരുന്നു. പുതിയ കാർഡിനായി ഒരുമാസം മുമ്പ്​ അപേക്ഷിച്ചെങ്കിലും ലഭിച്ചിരുന്നില്ല. ഈ വിവരം കൃത്യമായി പറഞ്ഞതാണ് ഫോൺകാൾ വിശ്വസിക്കാൻ ഇടയാക്കിയത്. അക്കൗണ്ട് നമ്പരടക്കം പറഞ്ഞുകൊടുത്ത് മിനിറ്റുകൾക്കകം അക്കൗണ്ടിൽ നിന്ന്​ പണം നഷ്​ടമാവുകയായിരുന്നു. പണം പിൻവലിച്ചതായി കാട്ടി മൊബൈൽ ഫോണിൽ സന്ദേശമെത്തിയപ്പോഴാണ് തട്ടിപ്പ് തിരിച്ചറിഞ്ഞത്. തുടർന്ന് സഖറിയ മാത്യു തിരുവല്ല പൊലീസിലും സൈബർ സെല്ലിലും പരാതി നൽകി. കോവിഡ് വാക്സി​ൻെറ പേരിലും പണം തട്ടിപ്പ്​ നടക്കുന്നതായി പൊലീസ് പറഞ്ഞു. വാക്സിൻ എടുക്കണമെങ്കിൽ രജിസ്​റ്റർ ചെയ്യണമെന്നും ഇതിന്​ ആധാർ കാർഡ്, ബാങ്ക് അക്കൗണ്ട് നമ്പർ എന്നിവ ചോദിച്ചാണ് ഫോൺ വരുന്നത്. നമ്പറുകൾ നൽകിക്കഴിഞ്ഞാൽ നിമിഷങ്ങൾക്കകം അക്കൗണ്ടിൽനിന്ന്​ പണം പിൻവലിക്കപ്പെടും. ഇത്തരം തട്ടിപ്പുകളിൽ അകപ്പെടരുതെന്നും പൊലീസ് മുന്നറിയിപ്പ് നൽകി.