ഓമല്ലൂർ വയൽവാണിഭം 15 മുതൽ

പത്തനംതിട്ട: ഓമല്ലൂർ വയൽ വാണിഭം 15ന്​ ആരംഭിക്കുമെന്ന്​ ഭാരവാഹികൾ വാർത്ത സമ്മേളനത്തിൽ അറിയിച്ചു. ഗതകാല സ്​മരണ ഉണർത്തുന്ന വയൽവാണിഭത്തിന്‍റെ ചരിത്രം പുനഃസൃഷ്ടിച്ച്​ 14ന്​ രാവിലെ 10ന്​ കൊല്ലം വെളിനെല്ലൂർ തെക്കേക്കവലയിൽനിന്ന്​ ഓമല്ലൂരിലേക്ക്​ ദീപശിഖ പ്രയാണ വിളംബരഘോഷ യാത്ര നടക്കും. ​വൈകീട്ട്​ അഞ്ചിന്​ ഓമല്ലൂരിൽ സ്വീകരണം. കാളവണ്ടികൾ ഉപയോഗിച്ചിരുന്ന കാലത്ത്​ വെളിനെല്ലൂർ തെ​ക്കേക്കവലയിൽനിന്ന്​ ഒരു കാളക്കൂറ്റൻ കെട്ടിയിരുന്ന പാലക്കുറ്റിയോടുകൂടി വിരണ്ടോടി ഓമല്ലൂർ വയലിൽ എത്തുകയും ഇവിടെയുള്ള ഒരു കർഷകൻ അതിനെ പാലക്കുറ്റിയിൽതന്നെ ബന്ധിക്കുകയും ചെ​യ്തതായാണ്​ ഐതിഹ്യം. ആ പാലക്കുറ്റി വളർന്ന്​ വലിയ പാലമരമായി തീർന്നു. ഈ പാലമരച്ചുവട്ടിലാണ് പിന്നീട്​ വയൽവാണിഭം ആരംഭിച്ചത്​. 15ന്​ രാവിലെ 10ന്​ പഞ്ചായത്ത്​ ഓഡിറ്റോറിയത്തിൽ കാർഷിക വിപണനമേള ആന്‍റോ ആന്‍റണി എം.പി ഉദ്​ഘാടനം ചെയ്യും. 11ന്​ കാർഷിക സെമിനാർ. 5.30ന്​ സാംസ്​കാരിക സമ്മേളനം മന്ത്രി വീണ ജോർജ്​ ഉദ്​ഘാടനം ചെയ്യും. രാത്രി ഏഴിന്​ ഗാനമാലിക, 8.30ന്​ കോമഡിഷോ. 16ന്​ രാവിലെ 10 .30 ന്​ തൊഴിലുറപ്പ്​ പദ്ധതി ശിൽപശാല, വൈകീട്ട്​ അഞ്ചിന്​ കവിയരങ്ങ്​ വയലാർ ശരത്​ ചന്ദ്രവർമ ഉദ്​ഘാടനം ചെയ്യും. വൈകീട്ട്​ ഏഴിന്​ ന്യത്തസന്ധ്യ, എട്ടിന്​ നാടൻപാട്ട്​. 17 ന്​ രാവിലെ 10 ന്​ ജനകീയാസൂത്രണം അനുമോദന സദസ്സും ജനപ്രതിനിധികളെ ആദരിക്കലും കലക്ടർ ഡോ. ദിവ്യ എസ്​.​ അയ്യർ ഉദ്​ഘാടനം ചെയ്യും. 11.30 ന്​ മൃഗസംരക്ഷണ സെമിനാർ. വൈകീട്ട് ​അഞ്ചിന്​ കുടുംബശ്രീ അംഗങ്ങൾ അവതരിപ്പിക്കുന്ന കലാപരിപാടികൾ. തുടർന്ന്​ സമാപന സമ്മേളനം ജില്ല പഞ്ചായത്ത്​ പ്രസിഡന്‍റ്​ ഓമല്ലൂർ ശങ്കരൻ ഉദ്​ഘാടനം ചെയ്യും. രാത്രി എട്ടിന്​ ഗാനമേള. കാളച്ചന്തയിൽ പ​ങ്കെടുക്കുന്ന മികച്ച ഒരു ജോടി കാളകളുടെയും പോത്തുകളുടെയും ഉടമക്ക്​ കാഷ്​ അവാർഡ്​ നൽകും. വാർത്ത സമ്മേളനത്തിൽ പഞ്ചായത്ത്​​ പ്രസിഡന്‍റ്​ ജോൺസൻ വിളവിനാൽ, ജനറൽ കൺവീനർ ബൈജു ഓമല്ലൂർ, കൺവീനർ സുബിൻ തോമസ്,​ ആരോഗ്യ വിദ്യാഭ്യാസ സ്റ്റാൻഡിങ്​ കമ്മിറ്റി ചെയർമാൻ എസ്​. മനോജ്​കുമാർ, പബ്ലിസിറ്റി കമ്മിറ്റി ചെയർമാൻ എം.ആർ. അനിൽകുമാർ എന്നിവർ പ​ങ്കെടുത്തു.