കടമ്മനിട്ട പടയണി 14ന്​ തുടങ്ങും

പത്തംതിട്ട: കടമ്മനിട്ട ഭഗവതി ​ക്ഷേത്രത്തിലെ പടയണി ചടങ്ങുകൾ​​ 14ന്​ രാത്രി ഒമ്പതിന്​ തുടങ്ങും. പടയണി ആശാൻ ശ്രീകോവിലിൽനിന്ന്​​ ക്ഷേ​​ത്ര മേൽശാന്തി ചൂട്ടുകറ്റയിൽ പകർന്നുനൽകുന്ന അഗ്​നി ദേവിക്ക്​ അഭിമുഖമായിനിന്ന്​​ പടയണിക്കളത്തിലെ കല്ലിൽ വെക്കും. അതിനു​ശേഷം പച്ചത്തപ്പ്​ കൊട്ടിവിളിച്ചിറക്കും. അവകാശ കുടുംബത്തിൽനിന്ന്​ കൊണ്ടുവരുന്ന തേങ്ങ മുറിച്ച്​ രാശിനോക്കി പത്തുനാൾ നീളുന്ന പടയണിയുടെ ഫലം പറയും. രണ്ടാം ദിവസവും പച്ചത്തപ്പ്​ കൊട്ടി വിളിച്ചിറക്കും. 16ന്​ മൂന്നാംനാൾ കാച്ചികൊട്ടോടെ പടയണി ആരംഭിക്കും. എഴാം ദിവസം വരെ കൂട്ടകോലം ഉണ്ടാകും. 21നാണ്​ വലിയ പടയണി. വല്യപടയണി ദിവസം എല്ലാ കോലങ്ങളും കളത്തിൽ ഉറഞ്ഞുതുള്ളും. വൈകീട്ട്​ 7.15ന്​ സാംസ്കാരിക സമ്മേളനം കലക്ടർ ഡോ. ദിവ്യ എസ്​.അയ്യർ ഉദ്​ഘാടനം ചെയ്യും. പ്രഫ. കടമ്മനിട്ട വാസുദേവൻപിള്ള ഏർപ്പെടുത്തിയ രാമൻനായർ ആശാൻ പുരസ്​കാരം നാരങ്ങാനം പടയണി ആശാൻ മടത്തുംപടി നെടുവേലിൽ ടി.എസ്.​ രാധാകൃഷ്ണൻ നായർക്ക്​ സമർപ്പിക്കും. വെള്ളാവൂർ തോട്ടത്തിൽ രാമക്കുറുപ്പ്​ സ്​മാരക പുരസ്​കാരം പി.ടി. പ്രസന്നകുമാറിന്​ വി.കെ. പുരുഷോത്തമൻപിള്ളയും നൽകും. രാത്രി 11.30നാണ്​ വലിയപടയണി. 23ന്​ രാവിലെ ഒമ്പതിന്​ പകൽ പടയണി നടക്കും. വൈകീട്ട്​ നാലിന്​ എഴുന്നള്ളത്ത്​. 6.30ന്​ ദീപാരാധന.​ രാത്രി 11ന്​ എഴുന്നള്ളത്തും വിളക്കും. വാർത്തസമ്മേളനത്തിൽ പ്രസിഡന്‍റ്​ കെ. ഹരിദാസ്, ​സെക്രട്ടറി ഡി. രഘുകുമാർ എന്നിവർ പ​​ങ്കെടുത്തു.