കോമളത്ത് പുതിയ പാലം: 12 ​കോടി അനുവദിച്ചെന്ന്​

മല്ലപ്പള്ളി: കോമളത്ത് പുതിയ പാലം നിർമിക്കുന്നതിന് 12 കോടി അനുവദിച്ചതായും ഇതിന്‍റെ ഭരണാനുമതിക്കായി സമർപ്പിച്ചിട്ടുണ്ടെന്നും പൊതുമരാമത്ത് വകുപ്പ് താലൂക്ക് വികസന സമിതിയിൽ അറിയിച്ചു. കല്ലൂപ്പാറ പഞ്ചായത്തിലെ ശാസ്താങ്കൽ -കടമാൻകുളം റോഡിലെ നിർമാണം പൂർത്തിയാകും മുമ്പ്​ വാട്ടർ അതോറിറ്റിയുടെ നിലവിലെ പൈപ്പുകൾ മാറ്റി പുതിയവ സ്ഥാപിക്കണമെന്നും യോഗത്തിൽ നിർദേശം ഉയർന്നു. മല്ലപ്പള്ളി മിനി സിവിൽ സ്റ്റേഷനിൽ എ.ടി.എം കൗണ്ടർ സ്ഥാപിക്കണം, കൊറ്റൻ കുടി മണ്ണുംപുറം റോഡ്​ വീതി എട്ടു മീറ്ററായി നിജപ്പെടുത്തി വീതികുറഞ്ഞ ഭാഗം അളന്ന് തിട്ടപ്പെടുത്തണം, പനയമ്പാല തോടിന്‍റെ തീരങ്ങൾ സംരക്ഷിണം, കല്ലൂപ്പാറ പ്രാഥമികാരോഗ്യ കേന്ദ്രത്തിൽ അനുവദിച്ച ദന്തവിഭാഗത്തിന് ഉടൻ കെട്ടിടം പണിയണം, കുന്നന്താനം ജങ്​ഷനിലെ ഗതാഗതപ്രശ്നം പരിഹരിക്കാൻ ബസ് സ്റ്റോപ് പുനഃക്രമീകരിക്കണം എന്നീ നിർദേശങ്ങളും യോഗത്തിൽ ഉയർന്നു. സംസ്ഥാനത്തെ മികച്ച താലൂക്ക് സപ്ലൈ ഓഫിസർ അഭിമന്യുവിനെയും സപ്ലൈ ഓഫിസിലെ ജീവനക്കാരെയും യോഗത്തിൽ അനുമോദിച്ചു. ജില്ല പഞ്ചായത്ത്​ അംഗം ജിജി മാത്യുവിന്‍റെ അധ്യക്ഷതയിൽ കൂടിയ വികസന സമിതി യോഗത്തിൽ ബ്ലോക്ക് പഞ്ചായത്ത് പ്രസിഡന്‍റ്​ ബിന്ദു ചന്ദ്രമോഹൻ, പഞ്ചായത്ത് പ്രസിഡന്‍റുമാരായ ഗീത കുര്യാക്കോസ്, പ്രമീള വസന്ത് മാത്യു, ശോഭ മാത്യു തുടങ്ങിയവരും വകുപ്പുതല ഉദ്യോഗസ്ഥരും പങ്കെടുത്തു.