മാലിന്യം കുന്നുകൂടി കോന്നി നാരായണപുരം ചന്ത

കോന്നി: നാരായണപുരം ചന്തയിൽ മാലിന്യസംസ്കരണം നിലച്ചതോടെ വ്യാപാരികളും പൊതുജനങ്ങളും ദുരിതത്തിൽ. രണ്ടുമാസത്തിൽ ഏറെയായി ചന്തയിലെ മാലിന്യം ഗ്രാമപഞ്ചായത്ത് അധികൃതർ നീക്കംചെയ്തിട്ട്. ദുർഗന്ധം മൂലം പ്രദേശത്ത് നിൽക്കാൻപോലും സാധിക്കാത്ത അവസ്ഥയാണിപ്പോൾ. മാലിന്യം സംസ്കരിക്കാൻ എയ്​റോബിക് കമ്പോസ്റ്റ് സംവിധാനം ഉണ്ടെങ്കിലും ഇതും പ്രവർത്തനക്ഷമമല്ല. വിഷയം പരിഹരിക്കണമെന്ന് ആവശ്യപ്പെട്ട് ചന്തയിലെ വ്യാപാരികൾ നിരവധി തവണ കോന്നി ഗ്രാമപഞ്ചായത്ത് അധികൃതർക്ക് പരാതി നൽകിയെങ്കിലും ഒരു ഫലവും ഉണ്ടായില്ല. മുമ്പ്​ ഇവിടെ ആധുനിക അറവുശാല നിർമാണം ആരംഭിച്ചെങ്കിലും പാതിവഴിയിൽ ഉപേക്ഷിച്ചു. മാലിന്യം അഴുകുന്ന ജലത്തിൽ കൊതുകുകളും മുട്ടയിടുന്നുണ്ട്.