ചവറ ടൈറ്റാനിയം-മുണ്ടക്കയം ദേശീയ പാത നവീകരണം അതിവേഗം നടത്താൻ നീക്കം

അടൂർ: ജില്ലയിലൂടെ കടന്നുപോകുന്ന ദേശീയപാത 183എയുടെ നവീകരണം അതിവേഗം നടത്താൻ നീക്കം. ചവറ ടൈറ്റാനിയം ജങ്ഷനിൽനിന്ന്​ ആരംഭിച്ച് കടമ്പനാട്-അടൂർ-കൈപ്പട്ടൂർ-മൈലപ്ര-വടശ്ശേരിക്കര-ളാഹ-പ്ലാപ്പള്ളി-കണമല-എരുമേലി-മുണ്ടക്കയം വഴി മുപ്പത്തഞ്ചാം മൈലിൽ എത്തും. 120 കിലോമീറ്റർ നീളമാണ് ഉള്ളത്. ഇതോടെ ശബരിമല തീർഥാടകരുടെ പ്രധാന പാതയായി ഇത് മാറും. പ്ലാപ്പള്ളിയിൽനിന്ന് പമ്പവരെ പാതക്ക്​ എക്​സ്റ്റെൻഷനുണ്ട്. 28 കിലോമീറ്റർ ദൂരമാണ് ഈ ഭാഗത്തിനുള്ളത്. അടൂർ നെല്ലിമൂട്ടിപ്പടിയിൽനിന്ന് ആനന്ദപ്പള്ളിവരെ ബൈപാസ് ഉണ്ടാകും. ഓമല്ലൂർ ടൗണിൽ വരാതെ ബൈപാസുവഴി പുത്തൻപീടികയിലെത്തി പത്തനംതിട്ട ടൗണിൽ കടക്കാതെ ചെറിയ ബൈപാസുവഴി മൈലപ്ര പഞ്ചായത്ത്​ ഓഫിസിന് സമീപത്തുകൂടി വടശ്ശേരിക്കര എത്തും. ളാഹ-പ്ലാപ്പള്ളി-കണമല എം.ഇ.എസ് കോളജ് ജങ്ഷനിൽനിന്ന് എരുമേലി-മുണ്ടക്കയം റോഡിന് സമാന്തരമായി എട്ട് കിലോമീറ്റർ ബൈപാസുവഴി കരിനിലത്ത് എത്തും. അവിടെ നിന്ന് മുണ്ടക്കയം ടൗണിൽ പ്രവേശിക്കാതെ മുപ്പത്തഞ്ചാം മൈലിൽ എത്തും. പ്രാഥമികമായി ചവറ ടൈറ്റാനിയം മുതൽ നെല്ലിമൂട്ടിൽപടിവരെ പാത വീതികൂട്ടും. ഈ ഭാഗങ്ങളിലെ കലുങ്കുകളും വീതികൂട്ടി നിർമിക്കും. മണ്ണാറക്കുളഞ്ഞി മുതൽ പമ്പവരെയും തിരിച്ച് കണമലവരെയുമുള്ള റോഡിന് 35 കോടി അനുവദിച്ചിട്ടുണ്ട്. കണമല-മുണ്ടക്കയം വരെ റോഡ് 16 കോടി മുടക്കി നവീകരണം നടത്തി. 18 മീറ്റർ വീതിയിൽ ബൈപാസും വേണം. PTL ADR Highway ചവറ ടൈറ്റാനിയം-മുണ്ടക്കയം ദേശീയ പാത