സർബത്തിനെ ഞെട്ടിച്ച് ചെറുനാരങ്ങ വില...

പത്തനംതിട്ട: ചെറുനാരങ്ങയുടെ വില കുതിച്ചുയരുന്നു. സർബത്ത് വിൽപനയടക്കം നിർത്തി ചെറുകിട വ്യാപാരികൾ. വിലക്കയറ്റം നാരങ്ങ വ്യാപാരികളെയും വഴിയോര കച്ചവടക്കാരെയും പ്രതിസന്ധിയിലാക്കി. വേനൽ രൂക്ഷമായതോടെ ചെറുനാരങ്ങക്ക്​ വൻ ഡിമാൻഡായി​. ലഭ്യത വലിയതോതിൽ കുറഞ്ഞിട്ടുണ്ട്​. ഇതാണ്​ വിലക്കയറ്റം രൂക്ഷമാക്കിയത്​. അപ്രതീക്ഷിതമായി വില ഉയർന്നതോടെ ജനങ്ങളുടെ ഇഷ്ടപാനീയമായ നാരങ്ങ സർബത്തിന്‍റെ വിൽപന പല ചെറുകിട വ്യാപാരികളും നിർത്തിവെച്ചു. ​കിലോക്ക്​ നിലവിൽ 240 മുതൽ 260 വരെയാണ് വിപണിവില. നേരത്തേ ഇത്​ 40 മുതൽ 60 രൂപ വരെ ആയിരുന്നു. 240 രൂപക്ക്​ ചെറുനാരങ്ങ വാങ്ങി 20 രൂപക്ക്​ സർബത്ത് വിൽക്കാൻ കഴിയില്ലെന്ന് വ്യാപാരികൾ പറയുന്നു. ഇതോടെ ഏറ്റവും ചുരുങ്ങിയ ചെലവിൽ ദാഹമകറ്റുന്ന പ്രിയപ്പെട്ട പാനീയമാണ് ഈ വേനൽക്കാലത്ത് അന്യമാകുന്നത്. റമദാൻ- നോമ്പിന്‍റെ ക്ഷീണമകറ്റാൻ നോമ്പുതുറകളിൽ ഏറെ ആശ്രയിക്കുന്നതും ചെറുനാരങ്ങയെയാണ്. വിവാഹ ചടങ്ങുകൾക്കും ഒഴിച്ചുകൂട്ടാനാവാത്ത ചെറുനാരങ്ങ വിവാഹച്ചെലവിന്‍റെ ബജറ്റിനെയും പ്രതികൂലമായി ബാധിക്കുന്നുണ്ട്. തമിഴ്നാട്ടിൽ ചെറുനാരങ്ങ കൃഷിയിടങ്ങളിൽ സീസൺ അവസാനിച്ചതിനുപിന്നാലെ ചിലയിടങ്ങളിൽ വന്യമൃഗങ്ങളും മയിലുകളും വ്യപകമായി കൃഷി നശിപ്പിച്ചതാണ്​ ക്ഷാമത്തിന് കാരണമെന്ന് തമിഴ്നാട് സ്വദേശികളായ വഴിയോര കച്ചവടക്കാർ പറയുന്നു.