ഫോട്ടോ വണ്ടിക്ക് ജില്ലയിൽ സ്വീകരണം

പത്തനംതിട്ട: കേരള പത്രപ്രവർത്തക യൂനിയനും കേരള ഒളിമ്പിക് അസോ., കേരള മീഡിയ അക്കാദമി സംയുക്തമായി കേരള ഗെയിംസിന്‍റെ പ്രചാരണത്തിനായി സംഘടിപ്പിച്ച ഫോട്ടോവണ്ടി 26ന് ജില്ലയിൽ പര്യടനം നടത്തും. പത്രത്താളുകളിലെ കേരള കായിക ചരിത്രവുമായി 16 ന്​ പി.ടി. ഉഷയുടെ വീട് സ്ഥിതിചെയ്യുന്ന പയ്യോളിയിൽ നിന്നുമാണ്​ പര്യടനം തുടങ്ങിയത്​. 26ന്​ രാവിലെ 9.30ന് തിരുവല്ലയിൽ എത്തുന്ന ഫോട്ടോ വണ്ടിയെ കുരിശുകവലയിൽ സ്വീകരിക്കും. തുടർന്ന് തിരുവല്ല പബ്ലിക് സ്റ്റേഡിയത്തിന് സമീപമുള്ള ഓപൺ സ്റ്റേജിൽ നടക്കുന്ന ഉദ്​ഘാടന ചടങ്ങിൽ ഒളിമ്പിക് അസോ. ജില്ല പ്രസിഡന്‍റ്​ അഡ്വ. കെ. പ്രകാശ് ബാബു അധ്യക്ഷതവഹിക്കും. മാത്യു ടി.തോമസ് എം.എൽ.എ ജില്ലയിലെ പ്രദർശന പരിപാടികളുടെ ഉദ്ഘാടനം നിർവഹിക്കും. തിരുവല്ലയിലെ പര്യടനത്തിനുശേഷം വൈകീട്ട് മൂന്നിന്​ പത്തനംതിട്ടയിലെത്തും. പുതിയ പ്രൈവറ്റ് ബസ് സാൻഡിന് സമീപമുള്ള ഓപൺ സ്റ്റേജിലെ ചടങ്ങിൽ പ്രസ്​ ക്ലബ്​ പ്രസിഡന്‍റ്​ ബോബി എബ്രഹാം അധ്യക്ഷതവഹിക്കും. മുനിസിപ്പൽ ചെയർമാൻ അഡ്വ. സക്കീർ ഹുസൈൻ ഉദ്ഘാടനം നിർവഹിക്കും. ഗെയിമിന്‍റെ ഭാഗ്യചിഹ്ന​മായ നീരജിന്‍റെ 20 അടി നീളമുള്ള ബലൂൺ രൂപം തിരുവല്ലയിലും പത്തനംതിട്ടയിലും സ്ഥാപിക്കും. മേയ് ഒന്നുമുതൽ 10വരെയാണ് പ്രഥമ കേരള ഗയിംസ്​. ജില്ലയിൽ 514ഓളം കായികതാരങ്ങളാണ് സംസ്ഥാന ഒളിമ്പിക്സിൽ പങ്കെടുക്കുന്നത്. വാർത്തസമ്മേളനത്തിൽ പ്രസ്​ക്ലബ് പ്രസിഡന്‍റ്​ ബോബി എബ്രഹാം, ജില്ല സ്പോർട്സ് കൗൺസിൽ പ്രസിഡന്‍റ്​ കെ. അനിൽകുമാർ, ജില്ല ഒളിമ്പിക് അസോ. സെക്രട്ടറി ആർ. പ്രസന്നകുമാർ, ട്രഷറർ ഡോ. ചാർലി ചെറിയാൻ, കൺവീനർ പി.കെ. സലീം എന്നിവർ പങ്കെടുത്തു.