ആഞ്ഞിലിവീണ് സ്കൂട്ടർ യാത്രികക്ക് പരിക്കേറ്റു

അടൂർ: കായംകുളം പത്തനാപുരം സംസ്ഥാന പാതയിൽ പതിനാലാം മൈലിന് സമീപം അമ്പാടി ജങ്ഷനിൽ റോഡരികിൽനിന്ന ആഞ്ഞിലിയുടെ ശിഖിരം ഒടിഞ്ഞുവീണ് സ്കൂട്ടർ യാത്രക്കാരിക്ക് പരിക്ക്. വള്ളികുന്നം സ്വദേശിനി ജയശ്രീക്കാണ് പരിക്കേറ്റത്. ഇവർ അടൂർ ലൈഫ്‌ലൈൻ ഹോസ്പിറ്റലിൽ ചികിത്സ തേടി. മറ്റാർക്കും പരിക്കില്ല. ഈ ഹോസ്പിറ്റലിലെ തന്നെ നഴ്സായ ഇവർ ഡ്യൂട്ടി കഴിഞ്ഞ് വീട്ടിലേക്ക് മടങ്ങുന്നവഴിക്ക് വ്യാഴാഴ്ച രാത്രിയായിരുന്നു അപകടം. ഈ സമയം ഇതുവഴി പോയ കാറി‍ൻെറ ഗ്ലാസും പൊട്ടി.