കെ.എസ്.ആർ.ടി.സി: അടൂരിൽ ഡ്രൈവർക്ഷാമം; യാത്രക്ലേശം രൂക്ഷം

അടൂർ: ആവശ്യത്തിന് ഡ്രൈവർമാരില്ലാത്തതിനാൽ കെ.എസ്.ആർ.ടി.സി അടൂർ ഡിപ്പോയിലെ സർവിസുകൾ വെട്ടിക്കുറച്ചു. ഇതോടെ യാത്രക്ലേശം രൂക്ഷമായി. ആകെ 90 പേർ വേണ്ടിടത്ത് 68 പേർ മാത്രമാണുള്ളത്. മൂന്നുപേർ ദിവസ അവധിയും ഒരാൾ ഷണ്ടിങ് ഡ്യൂട്ടിയുമാണ്. കോവിഡ് കാലത്തിനുമുമ്പ്​ ദിനംപ്രതി 51 സർവിസുണ്ടായിരുന്നിടത്ത്​ ഇപ്പോൾ 35 സർവിസ് മാത്രമാണ് ഉള്ളത്​. പലരും ഓവർടൈം ഡ്യൂട്ടി ചെയ്താണ് ഇത്രയെങ്കിലും സർവിസുകൾ അയക്കുന്നത്. പല ഗ്രാമീണ സർവിസുകളും റദ്ദാക്കേണ്ട സ്ഥിതിയാണ്. അടൂർ-ആയൂർ ചെയിൻ സർവിസുകളെയും പ്രതികൂലമായി ബാധിക്കുന്നുണ്ട്. അതിനാൽ പാരലൽ സർവിസ് നടത്തി സ്വകാര്യ വാഹനങ്ങൾ പണം കൊയ്യുകയാണ്. 44 ബസുകളും 40 ഷെഡ്യൂളുകളുമാണ് ഉള്ളത്. ഉൾനാടൻ പ്രദേശങ്ങളിലേക്ക് പോകേണ്ടവർ വൻതുക നൽകി ടാക്സി വാഹനങ്ങളെയാണ് അഭയം പ്രാപിക്കുന്നത്.