ശബരിമല തീര്‍ഥാടകര്‍ക്ക് മികച്ചസൗകര്യം ഒരുക്കും -മന്ത്രി കെ. രാധാകൃഷ്ണന്‍

പത്തനംതിട്ട: ശബരിമല തീര്‍ഥാടകര്‍ക്ക് ഇടത്താവളങ്ങളില്‍ മികച്ച സൗകര്യമൊരുക്കുമെന്ന് മന്ത്രി കെ. രാധാകൃഷ്ണന്‍. ശബരിമല ഇടത്താവള വികസന പദ്ധതിയുടെ ഭാഗമായി കിഫ്ബിയുടെ സഹായത്തോടെ നിലക്കല്‍ മഹാദേവ ക്ഷേത്രത്തിന് സമീപം നിര്‍മിക്കുന്ന വിശ്രമകേന്ദ്രത്തിന്റെ നിര്‍മാണോദ്ഘാടനം നിര്‍വഹിക്കുകയായിരുന്നു മന്ത്രി. പുതുതായി നിര്‍മിക്കുന്ന ഇടത്താവളങ്ങള്‍ സംസ്ഥാനത്തിന് അകത്തുനിന്നും പുറത്തുനിന്നും എത്തുന്ന തീര്‍ഥാടകര്‍ക്ക് ഏറെ പ്രയോജനകരമാകും. കേവലം ശമ്പളം വാങ്ങുന്ന ഉദ്യോഗസ്ഥരായി മാത്രം ദേവസ്വം ബോര്‍ഡ് ഉദ്യോഗസ്ഥര്‍ മാറരുത്. ഏറ്റവും വൃത്തിയുള്ള കേന്ദ്രമാക്കി ശബരിമലയെ മാറ്റുകയാണ് ലക്ഷ്യമെന്നും മന്ത്രി പറഞ്ഞു. 54.35 കോടി ചെലവില്‍ 8855 ചതുരശ്ര മീറ്ററില്‍ ഇരുനിലയിലായി ഏഴു കെട്ടിടമാണ് നിര്‍മിക്കുന്നത്. അയ്യപ്പഭക്തര്‍ക്കുള്ള വിശ്രമകേന്ദ്രം, ശൗചാലയങ്ങള്‍, ലിഫ്റ്റ്, സീവേജ് ട്രീറ്റ്‌മെന്റ് പ്ലാന്റ് എന്നിവയും സജ്ജീകരിക്കും. പ്രമോദ് നാരായണ്‍ എം.എല്‍.എ അധ്യക്ഷത വഹിച്ചു. തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ. അനന്തഗോപന്‍, കലക്ടര്‍ ഡോ. ദിവ്യ എസ്. അയ്യര്‍, ദേവസ്വം ബോര്‍ഡ് അംഗങ്ങളായ പി.എം. തങ്കപ്പന്‍, മനോജ് ചരളേല്‍, ദേവസ്വം ബോര്‍ഡ് ചീഫ് എൻജിനീയര്‍(ജനറല്‍) ജി. കൃഷ്ണകുമാര്‍, ചീഫ് എൻജിനീയര്‍ ആര്‍. അജിത്ത് കുമാര്‍, നിലക്കല്‍ ദേവസ്വം അഡ്മിനിസ്‌ട്രേറ്റിവ് ഓഫിസര്‍ എസ്. ശ്രീകുമാര്‍ എന്നിവര്‍ പങ്കെടുത്തു. ഫോട്ടോ PTL 13 devaswom minister ശബരിമല ഇടത്താവള വികസന പദ്ധതിയുടെ ഭാഗമായി നിലക്കല്‍ മഹാദേവ ക്ഷേത്രത്തിന് സമീപം നിര്‍മിക്കുന്ന വിശ്രമകേന്ദ്രത്തിന്റെ നിര്‍മാണോദ്ഘാടനം മന്ത്രി കെ. രാധാകൃഷ്ണന്‍ നിർവഹിക്കുന്നു