അഭിരുചി കണ്ടെത്താന്‍ ശിശുക്ഷേമ സമിതിയുടെ അവധിക്കാല പഠനക്ലാസ്

പത്തനംതിട്ട: വിദ്യാര്‍ഥികളുടെ അഭിരുചി തിരിച്ചറിയുന്നതിനും പ്രചോദനം നല്‍കുന്നതിനുമായി ജില്ല ശിശുക്ഷേമ സമിതി അവധിക്കാല പഠനക്ലാസ് നടത്തുന്നു. ഈ മാസം 18 മുതല്‍ മേയ് 17 വരെ അടൂര്‍ ഗവ.യു.പി സ്‌കൂളിലും ബി.ആര്‍.സി ഓഫിസിലുമായാണ് ബാലോത്സവം 2022 എന്ന പേരില്‍ പഠന ക്ലാസ് നടത്തുന്നത്. പ്രമുഖരുമായി സംവാദിക്കാന്‍ വിദ്യാര്‍ഥികള്‍ക്ക് ഈ വേനല്‍ക്കാല ക്ലാസിലൂടെ അവസരം ലഭിക്കുമെന്ന്​ കലക്ടര്‍ ഡോ. ദിവ്യ എസ്.അയ്യര്‍ പറഞ്ഞു. പഠന ക്ലാസില്‍ എട്ടു മുതല്‍ 16 വയസ്സുവരെയുള്ള വിദ്യാര്‍ഥികള്‍ക്ക് പങ്കെടുക്കാം. ചിത്രരചന, ഒറിഗാമി, പ്രസംഗകല, ശാസ്ത്രീയ സംഗീതം, ഫോട്ടോഗ്രഫി, നൃത്തം, വയലിന്‍, തബല, ഗിറ്റാര്‍ എന്നീ മേഖലകളില്‍ പ്രഗല്​ഭരായ അധ്യാപകര്‍ പഠനക്ലാസുകള്‍ നയിക്കും. ഒരു കുട്ടിക്ക് മൂന്നു വിഷയങ്ങളില്‍ പങ്കെടുക്കാം. രാവിലെ ഒമ്പതു മുതല്‍ ഉച്ചക്ക്​ ഒന്നുവരെ ക്ലാസുകളും ഉച്ചക്ക്​ രണ്ടുമുതല്‍ അഞ്ചുവരെ പ്രമുഖരുമായുള്ള സംവാദം, നാടന്‍പാട്ട്, മോട്ടിവേഷന്‍ ക്ലാസ് എന്നിവയും നടത്തും. പഠനക്ലാസിനെക്കുറിച്ച് വിശദീകരിക്കുന്നതിന് നടത്തിയ വാര്‍ത്തസമ്മേളനത്തില്‍ ജില്ല ശിശുക്ഷേമ സമിതി സെക്രട്ടറി ജി. പൊന്നമ്മ, ട്രഷറര്‍ ആര്‍. ഭാസ്‌കരന്‍ നായര്‍, ജോയന്‍റ്​ സെക്രട്ടറി എം.എസ്. ജോണ്‍, കെ.കെ. വിമല്‍ രാജ് തുടങ്ങിയവര്‍ പങ്കെടുത്തു. കൂടുതല്‍ വിവരങ്ങള്‍ക്ക് 9645374919, 9400063953 എന്നീ നമ്പറുകളില്‍ ബന്ധപ്പെടുക. ജില്ല വികസന സമിതി യോഗം പത്തനംതിട്ട: ജില്ല വികസന സമിതി യോഗം ഈമാസം 30ന് രാവിലെ 11നും പ്രി-ഡി.ഡി.സി യോഗം 23ന് രാവിലെ 11നും ചേരുമെന്ന് ജില്ല പ്ലാനിങ്​ ഓഫിസര്‍ അറിയിച്ചു. തൊഴില്‍രഹിതര്‍ക്ക് വായ്പക്ക്​ അപേക്ഷിക്കാം പത്തനംതിട്ട: ജില്ലയിലെ പട്ടികജാതി, പട്ടികവര്‍ഗ വിഭാഗത്തില്‍പ്പെട്ട തൊഴില്‍രഹിതര്‍ക്ക് വസ്തു, ഉദ്യോഗസ്ഥ ജാമ്യവ്യവസ്ഥയില്‍ സ്വയംതൊഴില്‍, വിവാഹം, ഭവനം, ഭവന പുനഃരുദ്ധാരണ, വാഹന (ഓട്ടോറിക്ഷ മുതല്‍ ടാക്സി കാര്‍, ഗുഡ്സ് കാരിയര്‍ ഉൾപ്പെടെ കമേഴ്‌സ്യല്‍ വാഹനങ്ങള്‍) വായ്പകള്‍ക്ക് അപേക്ഷിക്കാം. സ്വയംതൊഴില്‍, വാഹന വായ്പക്ക്​ കുടുംബ വാര്‍ഷിക വരുമാനം 3,50,000 രൂപയില്‍ കവിയരുത്. പ്രായം 18നും 55നും മധ്യേ. പെണ്‍കുട്ടികളുടെ വിവാഹ വായ്പക്ക്​ അപേക്ഷിക്കുന്ന രക്ഷാകര്‍ത്താവിന്‍റെ പ്രായപരിധി 65 വയസ്സ്​. വരുമാനപരിധി 3,00,000 രൂപ. വാഹന വായ്പക്ക്​ അപേക്ഷിക്കുന്നവര്‍ക്ക് ലൈസന്‍സ് ഉണ്ടായിരിക്കണം. അപേക്ഷഫോമും കൂടുതല്‍ വിവരങ്ങള്‍ക്കും എം.സി റോഡില്‍ പന്തളം പോസ്റ്റ്​ ഓഫിസിനു സമീപമുള്ള അഞ്ജലി ബില്‍ഡിങ്ങിന്‍റെ ഒന്നാംനിലയില്‍ പ്രവര്‍ത്തിക്കുന്ന കോര്‍പറേഷന്‍റെ ജില്ല ഓഫിസുമായി ബന്ധപ്പെടണം. ഫോണ്‍: 9400068503.