ഗിന്നസ് പക്രു സഞ്ചരിച്ച കാർ പാർസൽ ലോറിയുമായി കൂട്ടിയിടിച്ചു

തിരുവല്ല: ചലച്ചിത്രതാരം ഗിന്നസ് പക്രു സഞ്ചരിച്ച ഇന്നോവ കാർ തിരുവല്ല ബൈപാസിൽ പാർസൽ ലോറിയുമായി കൂട്ടിയിടിച്ചു. അപകടത്തിൽ ആർക്കും പരിക്കില്ല. ബൈപാസിലെ മഴുവങ്ങാടുചിറക്ക്​ സമീപത്തെ പാലത്തിൽ തിങ്കളാഴ്ച ഉച്ചക്ക്​ ഒരുമണിയോടെ ആയിരുന്നു അപകടം. മറ്റൊരു വാഹനത്തെ മറികടന്നെത്തിയ ലോറി എതിർദിശയിൽനിന്ന്​ വന്ന കാറി‍ൻെറ പിൻവശത്തെ ടയറിൽ ഇടിക്കുകയായിരുന്നു. ഗിന്നസ്​ പക്രു തിരുവനന്തപുരത്തുനിന്ന്​ കൊച്ചിയിലേക്ക് പോവുകയായിരുന്നു. മറ്റൊരു കാറിൽ കൊച്ചിയിലേക്ക് യാത്ര തുടർന്നു. തിരുവല്ല പൊലീസ് കേസെടുത്തു.