റോഡ് അറ്റകുറ്റപ്പണി നടത്താത്തതിൽ പ്രതിഷേധം

തിരുവല്ല: റോഡ്​ അറ്റകുറ്റപ്പണി നടത്തുന്നതിൽ പൊതുമരാമത്ത് കാട്ടുന്ന അനാസ്ഥയിൽ പ്രതിഷേധിച്ച് കുറ്റൂരിൽ ജനപ്രതിനിധികളുടെ നേതൃത്വത്തിൽ റോഡിലെ കുഴികൾ അടച്ചു. കുറ്റൂർ പഞ്ചായത്തിലെ ആറാട്ടുകടവ്-വഞ്ചിമൂട്ടിൽ റോഡിലെ കുഴികളാണ് ഗ്രാമപഞ്ചായത്ത്​ അംഗം ശ്രീവല്ലഭൻ നായർ, ബ്ലോക്ക് അംഗം കെ.എസ്. രാജലക്ഷ്മി എന്നിവരുടെ നേതൃത്വത്തിൽ അടച്ചത്. വാഹന യാത്രക്കാരുടെ കാഴ്ച മറയ്ക്കുംവിധം റോഡിന്‍റെ ഇരുവശത്തുമായി വളർന്നുനിന്ന കാടും പ്രവർത്തകർ വെട്ടിനീക്കി. മധുസൂദനൻ നായർ, ഉണ്ണികൃഷ്ണൻ, അനിൽകുമാർ, സുരേഷ് കുമാർ തുടങ്ങിയവരും പങ്കെടുത്തു.