കാർ മറിഞ്ഞു; ആളപായമില്ല

അടൂർ: നിയന്ത്രണംവിട്ട കാർ പാതയരികിലെ മൺതിട്ടയിലിടിച്ച് കയറി വൈദ്യുതി തൂണിൽ ഇടിച്ചുമറിഞ്ഞു. യാത്രക്കാർ പരിക്കേൽക്കാതെ രക്ഷപ്പെട്ടു. ഏഴംകുളം കിളിക്കോട്-ചായലോട് പാതയിൽ വെള്ളിയാഴ്ച രാവിലെ എട്ടിനാണ് കാർ അപകടത്തിൽപ്പെട്ടത്. കാർ യാത്രികരായ ഹരിപ്പാട് സ്വദേശിനികളായ ഫാസില, ബേബി എന്നിവർ പരിക്കുകൾ കൂടാതെ രക്ഷപ്പെട്ടു. അടൂരിൽനിന്ന് അഗ്നിരക്ഷ സേനയെത്തി പോസ്റ്റും വാഹനവും റോഡിൽനിന്ന്​ മാറ്റി ഗതാഗതം പുനഃസ്ഥാപിച്ചു. സ്റ്റേഷൻ ഓഫിസർ വി. വിനോദ്കുമാറിന്‍റെ നേതൃത്വത്തിൽ അസി. സ്റ്റേഷൻ ഓഫിസർ (ഗ്രേഡ്) ഷാനവാസ്, ഫയർ ആൻഡ് റെസ്ക്യു ഓഫിസർമാരായ ഷാജു, സൂരജ്, സുരേഷ് കുമാർ, കൃഷ്ണകുമാർ, സന്തോഷ് എന്നിവരാണ് രക്ഷാപ്രവർത്തനത്തിൽ ഏർപ്പെട്ടത്.