തട്ടാരമ്പലം-പന്തളം റോഡ്​: കുന്നിക്കുഴി ജങ്​ഷനിലെ കലുങ്ക്​ നിർമാണം പാതിവഴിയിൽ

പന്തളം: തട്ടാരമ്പലം-പന്തളം റോഡ്​ നവീകരണത്തിന്റെ ഭാഗമായി തുടങ്ങിയ കുന്നികുഴി ജങ്​ഷനിലെ കലുങ്ക്​ നിർമാണം പാതിവഴിയിൽ. ഇത്​ സമീപവാസികളെയും യാത്രക്കാരെയും ഒരുപോലെ ദുരിതത്തിലാക്കുന്നു. നാലുമാസത്തിനുമുമ്പാണ് ഇവിടെ കലുങ്കിന്റെയും ഓടയുടെയും നിർമാണമാരംഭിച്ചത്. റോഡിന്റെ പകുതി പൊളിച്ച് കലുങ്ക്​ നിർമാണം നടത്തിയിട്ട്​ മൂന്നുമാസമായി. ആ സമയത്ത് ഗതാഗതം തടസ്സപ്പെടാതിരിക്കാൻ മറുവശത്തുകൂടി ഇരുദിശകളിലേക്കും വാഹനങ്ങൾ കടന്നുപോകാൻ അനുവദിച്ചു. റോഡിന്റെ ഒരുഭാഗത്തെ ഓട, കലുങ്ക് എന്നിവയുടെ നിർമാണം പൂർത്തിയാക്കി വാഹനങ്ങൾ കടന്നുപോകാൻ അനുവദിച്ചിട്ട്​ മാസങ്ങൾ കഴിഞ്ഞിട്ടും മറുവശത്തെ നിർമാണമാരംഭിച്ചില്ല. കലുങ്ക്​ പൂർത്തിയായ ഭാഗത്തിനും റോഡിന്റെ പൊളിക്കാത്ത ഭാഗത്തിനുമിടയിൽ ആഴത്തിലുള്ള കുഴിയുണ്ട്. വാഹനങ്ങൾ കുഴിയിൽ വീഴാതിരിക്കാൻ താൽക്കാലികമായി പ്ലാസ്റ്റിക് വള്ളിയും മുളയും വലിച്ചുകെട്ടുക മാത്രമാണ്​ ചെയ്തിരിക്കുന്നത്. രാത്രി അപകടസാധ്യത ഏറെയുള്ള ഇവിടെ പകൽസമയത്ത് ഗതാഗതക്കുരുക്കും രൂക്ഷമാണ്. അതിനിടെ, റോഡിന്റെ പകുതിഭാഗത്തെ കലുങ്ക്​ നിർമാണം എന്നുതുടങ്ങുമെന്ന്​ പറയാൻ അധികൃതർക്കാകുന്നില്ല. റോഡിന്റെ തെക്കുഭാഗത്ത്​ കലുങ്ക്​ നിർമിക്കാൻ വീടുകളോടുചേർന്ന്​ കുഴിയെടുക്കണം. ഇവിടെ അതിർത്തി നിർണയിച്ചു നൽകാത്തതിനാൽ കുഴിയെടുക്കാൻ സാധിക്കുന്നില്ലെന്ന്​ കരാറുകാർ പറഞ്ഞു. റോഡിന്റെ ഒരുഭാഗത്ത്​ കുഴിയെടുത്തപ്പോൾതന്നെ ജലവിതരണ പൈപ്പ്​ പൊട്ടി ദിവസങ്ങളോളം ജലവിതരണം തടസ്സപ്പെട്ടു. തെക്കുവശത്ത്​ കുഴിയെടുക്കുമ്പോൾ പ്രധാന പൈപ്പ്​ പൊട്ടാനും സാധ്യതയുണ്ട്. ഈ പ്രശ്നങ്ങൾക്കു പരിഹാരമുണ്ടാകാതെ ബാക്കി ജോലികൾ നടത്താൻ സാധിക്കില്ലെന്ന നിലപാടിലാണു കരാറെടുത്തിരിക്കുന്ന കമ്പനി. നിർമാണം അനിശ്ചിതമായി നീളുന്നതുമൂലം സമീപത്തെ വീട്ടുകാർ ദുരിതത്തിലാണ്. പൊടിശല്യം രൂക്ഷമായതിനാൽ അരമണിക്കൂർ ഇടവിട്ട് റോഡ്​ നനക്കണം. വിവിധ രോഗങ്ങളാൽ ബുദ്ധിമുട്ടുന്ന വയോധികരാണ് കൂടുതൽ ദുരിതമനുഭവിക്കുന്നത്. കലുങ്ക്​നിർമാണം പൂർത്തീകരിക്കുന്നതിനാൽ കുന്നിക്കുഴി ജങ്​ഷനിൽ പ്രവർത്തിക്കുന്ന വിദേശമദ്യശാലയിൽ എത്തുന്നവരുടെ വാഹനവും റോഡരികിൽ പാർക്ക് ചെയ്യുന്നത് ഗതാഗതക്കുരുക്കിന് ഇടയാക്കുന്നുണ്ട്.