ഏനാദിമംഗലത്ത് കാര്‍ഷിക മേഖലക്കും ഭവനനിർമാണത്തിനും ഊന്നൽ

അടൂർ: ഏനാദിമംഗലം ഗ്രാമപഞ്ചായത്തിലെ 2022-23 വര്‍ഷത്തെ ബജറ്റില്‍ 45.54 കോടി വരവും 44.61 കോടി ചെലവും 92 ലക്ഷം രൂപ മിച്ചവും പ്രതീക്ഷിക്കുന്ന ബജറ്റ് വൈസ് പ്രസിഡന്‍റ് ഉദയരശ്മി അനില്‍കുമാര്‍ അവതരിപ്പിച്ചു. പഞ്ചായത്ത് പ്രസിഡന്‍റ് പി. രാജഗോപാലന്‍ നായര്‍ അധ്യക്ഷത വഹിച്ചു. ഭൂരഹിത-ഭവനരഹിതര്‍ക്കും ഭവനമില്ലാത്തവര്‍ക്കം വസ്തുവും വീടും നല്‍കുന്നതിനായി സംസ്ഥാന സര്‍ക്കാറുമായി സഹകരിച്ച് ഒരുകോടി 90 ലക്ഷം രൂപയുടെ പദ്ധതി നടപ്പാക്കും. കാര്‍ഷിക മേഖലക്ക് പ്രാധാന്യം നല്‍കി 69,10,000 രൂപ വകയിരുത്തി. ഏനാദിമംഗലം ഹണി എന്ന ബ്രാന്‍ഡില്‍ തേനീച്ച വളര്‍ത്തലിനും സംസ്കരണത്തിനുംവേണ്ടി 25 ലക്ഷം രൂപ വകയിരുത്തി. ക്ഷീരമേഖലക്ക് ഉണര്‍വ് നല്‍കാന്‍ സബ്സിഡി, വെര്‍മി ബെഡ് തുടങ്ങിയ പദ്ധതികള്‍ക്കായി 56.5 ലക്ഷം രൂപ ഉള്‍പ്പെടുത്തി. കുടുംബശ്രീ പദ്ധതികള്‍ തൊഴിലുറപ്പ് പദ്ധതിയുമായി ബന്ധപ്പെടുത്തി തൊഴിലവസരങ്ങള്‍ സൃഷ്ടിക്കുന്നതിലേക്ക് 12.5 കോടി രൂപ വകയിരുത്തി. അടൂര്‍ താലൂക്കിലെ ഏറ്റവും ഉയര്‍ന്ന പ്രദേശങ്ങളിലൊന്നായ കുന്നിട അഞ്ചുമലപ്പാറ ഉള്‍പ്പെടുത്തി ഗ്രാമീണ ടൂറിസം പദ്ധതി വഴി പ്രത്യക്ഷമായും പരോക്ഷമായും തൊഴിലവസരങ്ങള്‍ സൃഷ്ടിക്കാനും പഞ്ചായത്തിന്​ വരുമാനമാര്‍ഗം സൃഷ്ടിക്കുന്ന പദ്ധതി സംസ്ഥാന സര്‍ക്കാറുമായി സഹകരിച്ച് ഒരുകോടി രൂപയുടെ പദ്ധതി ആവിഷ്കരിച്ചിട്ടുണ്ട്​. പഞ്ചായത്ത് പ്രദേശത്ത് ആധുനിക രീതിയിലുള്ള ശ്മശാനം നിർമിക്കുന്നതിനായി 12 കോടി വകയിരുത്തി. പഞ്ചായത്തിലെ റോഡ് വികസനത്തിന്​ ഒരുകോടി 90 ലക്ഷം രൂപ വകയിരുത്തി. വിവിധ ക്ഷേമ പെന്‍ഷനുകള്‍ക്ക് അഞ്ചുകോടി 51 ലക്ഷം രൂപ വകയിരുത്തി.