കടലാസിലൊതുങ്ങി മല്ലപ്പള്ളി ബസ് സ്റ്റാൻഡിലെ ശൗചാലയ നിർമാണം

മല്ലപ്പള്ളി: പഞ്ചായത്ത് ബസ് സ്റ്റാൻഡിൽ നിർമിക്കുന്ന കെട്ടിടസമുച്ചയത്തിൽ താഴത്തെ നിലയിൽ കംഫർട്ട് സ്റ്റേഷനും മുകളിൽ വിശ്രമമുറിയും വിഭാവനംചെയ്ത പദ്ധതി വർഷങ്ങൾ കഴിഞ്ഞിട്ടും കടലാസിൽതന്നെ. എം.എൽ.എയുടെ 2016-17 വർഷത്തെ ആസ്തിവികസന ഫണ്ടിൽനിന്ന്​ 1.17 കോടിയുടെ നിർമാണ പ്രവർത്തനങ്ങൾക്ക് 2019 ആഗസ്റ്റിലാണ് ഭരണാനുമതി ലഭിച്ചത്. ശൗചാലയ നിർമാണത്തിന്​ കണ്ടെത്തിയ സ്ഥലത്തിന് മുന്നിലെ കടമുറികൾ ഒഴിപ്പിച്ച് മണ്ണ് പരിശോധനയും നടത്തിയിരുന്നെങ്കിലും നിർമാണം നടന്നില്ല. താലൂക്ക് ആസ്ഥാനത്തെ ബസ് സ്റ്റാൻഡിലെത്തിയാൽ പ്രാഥമികാവശ്യങ്ങൾ നിറവേറ്റാൻ കഴിയാതെ ബുദ്ധിമുട്ടുകയാണ് യാത്രക്കാർ. ഇപ്പോഴുള്ളത് നിന്നുതിരിയാൻ സ്ഥലമില്ലാത്ത ഇടുങ്ങിയ ശൗചാലയമാണ്. ജില്ല പഞ്ചായത്ത് 2012ൽ സ്ഥാപിച്ച രണ്ട് ഇലക്​ട്രോണിക് ടോയ്​ലറ്റുകൾ ഉപയോഗപ്രദവുമല്ല. തടസ്സങ്ങൾ നീക്കി ശൗചാലയ നിർമാണത്തിനാവശ്യമായ നടപടിയുണ്ടാകണമെന്ന ആവശ്യം ശക്തമായി. ഫോട്ടോ: മല്ലപ്പള്ളി ബസ് സ്റ്റാൻഡിൽ വർഷങ്ങൾക്കുമുമ്പ്​ സ്ഥാപിച്ച ഇലക്ട്രോണിക് ടോയ്​ലറ്റുകൾ ഉപയോഗശൂന്യമായ നിലയിൽ