അമേരിക്കയിൽ ജോലി വാഗ്ദാനം; ലക്ഷങ്ങൾ തട്ടിയതായി പരാതി

ആരോപണവിധേയനായ പാസ്റ്റർ ബാബു ജോണിന്‍റെ തിരുവല്ലയിലെ വീട്ടിലേക്ക്​ തട്ടിപ്പിനിരയായവർ​​ വ്യാഴാഴ്ച മാർച്ച് ​നടത്തും പത്തനംതിട്ട: വിസ വാഗ്ദാനം നൽകി തിരുവല്ല സ്വദേശിയായ പാസ്റ്റർ​ പലരിൽനിന്ന്​ ലക്ഷക്കണക്കിന്​ രൂപ തട്ടിയെടുത്തതായി പരാതി. ആരോപണ വിധേയനായ പാസ്റ്റർ ബാബുജോണിന്‍റെ തിരുവല്ലയിലെ വീട്ടിലേക്ക്​ തട്ടിപ്പിനിരയായവർ​​ വ്യാഴാഴ്ച മാർച്ച്​ നടത്തും. വിവിധ ജില്ലകളിൽനിന്നായി 45ൽ അധികം പേരിൽനിന്ന്​ രണ്ടുകോടി തട്ടിയെടുത്തതായി​ ആക്​ഷൻ കൗൺസിൽ ഭാരവാഹികൾ വാർത്തസമ്മേളനത്തിൽ പറഞ്ഞു. തിരുവനന്തപുരം, കൊല്ലം, പത്തനംതിട്ട, കോട്ടയം, എറണാകുളം, തൃശുർ, ഇടുക്കി ജില്ലകളിൽ നിന്നുള്ളവർക്ക് ചാരിറ്റി വിസയുടെ പേരിലാണ്​ പാസ്റ്റർ ബാബു ജോണും സഹായി തിരുവനന്തപുരം സ്വദേശി ജയചന്ദ്രനും ചേർന്ന്​ തട്ടിപ്പ് നടത്തിയത്​. പ്രതികളെ അറസ്റ്റ് ചെയ്യണമെന്നും നഷ്ടപ്പെട്ട പണംവാങ്ങി നൽകണമെന്നും ആവശ്യപ്പെട്ട്​ തിരുവല്ല, കോട്ടയം, കടത്തുരുത്തി, ഈരാറ്റുപേട്ട, കുണ്ടറ പൊലീസ് സ്റ്റേഷനുകളിൽ പരാതി നൽകിയിരുന്നു​. എന്നാൽ, ഇതുവരെയും ഒരു നടപടിയും ഉണ്ടായിട്ടില്ല. ഇവർ മുൻകൂർ ജാമ്യത്തിനായി ശ്രമിക്കുകയാണ്. ബാബു ജോൺ ഇപ്പോഴും വീട്ടിൽ വരാറുണ്ട്. ബാബുജോണിന്‍റെയും ജയചന്ദ്രന്‍റെ പേരിലുള്ള അക്കൗണ്ടിലും ബാബുജോണിന്‍റെ ഭാര്യയുടെയും രണ്ട് പെൺമക്കളുടെയും അക്കൗണ്ടുകളിലേക്കാണ്​ രണ്ടരലക്ഷം രൂപ മുതൽ എട്ടുലക്ഷം വരെ ഓരോരുത്തരും നിക്ഷേപിച്ചത്. പണമായും നൽകിയിട്ടുണ്ട്. 2021ൽ ബാബുജോണും ഭാര്യയും ചേർന്ന്​ പണം ചോദിച്ച്​ ചെന്നവരെ മർദിച്ച സംഭവുമുണ്ട്​. പൊലീസ്​ അനാസ്ഥ തുടരുന്നതിനാൽ അന്വേഷണം ക്രൈംബ്രാഞ്ചിനെ ഏൽപിക്കണമെന്നും ഭാരവാഹികൾ ആവശ്യപ്പെട്ടു. പലിശക്ക്​ പണമെടുത്താണ് പണംനൽകിയത്. കൊല്ലം ജില്ലയിൽ ചവറ സ്വദേശിനി സ്മിത അഞ്ചുലക്ഷം രൂപായാണ്​ കൊടുത്തത്​. പലിശ കൊടുക്കാൻ നിർവാഹമില്ലാതെ 2021ൽ സ്മിത ആത്മഹത്യചെയ്തു. അവരുടെ കുടുംബത്തി സ്ഥിതി ഇപ്പോൾ ദയനീയമാണ്. ബാബുജോണിന്‍റെ കൈവശം അമേരിക്കൻ എംബസിയുടെ വ്യാജ സീലുകളും മറ്റു പലരേഖകളുമുണ്ട്​. മുഖ്യമന്ത്രിക്കും ഡി.ജി.പിക്കും ഇത്​ സംബന്ധിച്ച്​ പരാതി നൽകിയിട്ടുണ്ട്​. നീതി ലഭിക്കാത്തപക്ഷം നിരാഹാരം ഉൾപ്പെടെ സമരപരിപാടി തുടങ്ങുമെന്നും ആക്​ഷൻ കൗൺസിൽ ചെയർമാൻ ഉഷാകുമാരി കുണ്ടറ, ജനറൽ കൺവീനർ ശിവപ്രസാദ്​ ചവറ, ജിഷ്ണു വിജയൻ ചവറ എന്നിവർ പറഞ്ഞു.