തിരുവല്ല കാർഷിക ഗവേഷണകേന്ദ്രത്തിൽ സാമ്പത്തിക തിരിമറി; ഓഫിസ്​ അറ്റൻഡന്‍റിന്​ സസ്​പെൻഷൻ

പത്തനംതിട്ട: കാർഷിക സർവകലാശാലയുടെ കീഴിലെ തിരുവല്ല കാർഷിക ഗവേഷണകേന്ദ്രത്തിൽ 3.92 ലക്ഷം രൂപ സാമ്പത്തിക തിരിമറി. സംഭവത്തിൽ ഓഫിസ്​ അറ്റൻഡന്‍റ്​ കെ.ജി. പുഷ്പകുമാരിയെ സസ്​പെൻഡ്​ ചെയ്തു. കഴിഞ്ഞവർഷം ഡിസംബർ 12 മുതൽ ഫെബ്രുവരി 19വരെ ബാങ്കിൽ അടക്കാൻ ഏൽപിച്ച 3,92,946 രൂപ ഇവർ ബാങ്കിൽ അടക്കാതെ തട്ടിപ്പ്​ നടത്തിയെന്നാണ്​ കണ്ടെത്തിയത്​. ഇവിടുത്തെ പ്രതിദിന വരുമാനം ബാങ്കിൽ കൊണ്ടുപോയി അടച്ചിരുന്നത്​ പുഷ്പകുമാരിയാണ്​. ഏതാനും നാളുകളായി ഈ കേന്ദ്രത്തിലെ ബാങ്ക് അക്കൗണ്ടുകളുടെ സ്റ്റേറ്റ്മെന്റുകൾ ബാങ്കിൽനിന്ന്​ വാങ്ങാനുള്ള കത്ത് ബാങ്ക് ഡ്യൂട്ടി ചെയ്തുവന്ന പുഷ്പകുമാരിയുടെ കൈയിൽ നൽകിയിരുന്നെങ്കിലും പല കാരണങ്ങൾ പറഞ്ഞ്​ സ്റ്റേറ്റ്മെന്റ് ഓഫിസിൽ ഹാജരാക്കിയില്ല. തുടർന്ന് സംശയം തോന്നി സ്റ്റേറ്റ്മെന്റ് ബാങ്കിൽനിന്ന്​ നേരിട്ട് വാങ്ങി പരിശോധിച്ചപ്പോൾ തുക നിക്ഷേപിച്ചിട്ടില്ലെന്ന് കണ്ടെത്തുകയായിരുന്നു. പരിശോധിച്ചപ്പോൾ ഈ ദിവസങ്ങളിലെ ബാങ്ക് സ്ലിപ്പുകളും കണ്ടില്ല. പുഷ്പകുമാരിയോട് അന്വേഷിച്ചപ്പോൾ തുകകൾ ബാങ്കിൽ നിക്ഷേപിച്ചിട്ടില്ലെന്ന് വാക്കാൽ സമ്മതിച്ചതായി തിരുവല്ല ഗവേഷണകേന്ദ്രം മേധാവി കാർഷിക സർവകലാശാലക്ക്​ റിപ്പോർട്ട്​ നൽകി. തുടർന്ന് കാരണം കാണിക്കുന്നതിന് നോട്ടീസ് കൊടുത്തെങ്കിലും അതിന് അവർ മറുപടി നൽകിയില്ല. 26 വർഷത്തെ സർവിസും കാലങ്ങളായി ബാങ്ക് ഡ്യൂട്ടി ചെയ്തുവരുന്ന ആളുമാണ്​ പുഷ്പകുമാരി. ഈ മാസം​ മൂന്നിനാണ്​ അന്വേഷണവിധേയമായി പുഷ്പകുമാരിയെ സസ്​പെൻഡ്​ ചെയ്ത്​ കാർഷിക സർവകലാശാല ഉത്തരവിറക്കിയത്​.