അപകടക്കെണിയായി റോഡ് സൈഡിൽ ഉപേക്ഷിച്ച മിക്സിങ് മെഷീൻ

വടശ്ശേരിക്കര: ചിറ്റാർ ആങ്ങമൂഴി റോഡിലെ താഴത്തില്ലത്ത്​ പടിയിലെ വളവിൽ അപകടമുണ്ടാക്കുംവിധം ഇട്ടിരിക്കുന്ന കോൺക്രീറ്റ് മിക്സിങ് മെഷീൻ വാഹനങ്ങൾക്ക് ഭീഷണിയാകുന്നു. സമീപത്തുള്ള പഞ്ചായത്ത് റോഡ് കോൺക്രീറ്റ് ചെയ്യാൻവേണ്ടി ഒരാഴ്ചമുമ്പ്​ എത്തിച്ചതാണ് ഈ ഉപകരണം. ആവശ്യം കഴിഞ്ഞ്​ പ്രധാന റോഡിന്‍റെ ഓരത്തേക്ക് അലക്ഷ്യമായി നീക്കിയിട്ടതാണ് അപകടഭീഷണി ആകുന്നത്. ഇതിന്‍റെയൊരു ഭാഗം റോഡിലേക്ക് തള്ളി നിൽക്കുന്നതിനാൽ ഒട്ടനവധി അപകടങ്ങൾ ഉണ്ടായിട്ടുള്ള താഴത്തില്ലത്തുപടിയിൽ എതിർദിശയിൽനിന്ന് വരുന്ന വാഹനങ്ങൾ കാണാൻ കഴിയില്ല.