കെ.എസ്.ആർ.ടി.സി ഡിപ്പോ നിർത്താൻ നീക്കം -യു.ഡി.എഫ്

പന്തളം: പന്തളം കെ.എസ്.ആർ.ടി.സി ഗാരേജ് നിർത്തലാക്കാനുള്ള സർക്കാർ നീക്കം പന്തളം ഡിപ്പോ തന്നെ നിർത്തുന്നതിന്‍റെ ഭാഗമാണെന്ന്​ യു.ഡി.എഫ് ആരോപിച്ചു. ഇടതുമുന്നണി അധികാരത്തിൽവന്ന നാൾ മുതൽ പന്തളം ഡിപ്പോ നിർത്തലാക്കാനുള്ള ശ്രമം നടക്കുകയാണ്. ഗാരേജ് ജീവനക്കാരെ മറ്റിടങ്ങളിലേക്ക് സ്ഥലംമാറ്റിയപ്പോഴും ബസുകൾ മറ്റ്​ ഡിപ്പോകളിലേക്ക്​ മാറ്റിയപ്പോഴും യു.ഡി.എഫും കോൺഗ്രസും പ്രക്ഷോഭങ്ങൾ സംഘടിപ്പിച്ചിരുന്നു. അപ്പോഴൊക്കെ സമരം പ്രഹസനമാണെന്നും ഗാരേജും ഡിപ്പോയും എങ്ങുംപോകില്ലെന്നും പറഞ്ഞ എം.എൽ.എ ഇപ്പോൾ ഇരുട്ടിൽ തപ്പുകയാണ്. ഏക്കറുകണക്കിന്​ വസ്തു പന്തളം കെ.എസ്.ആർ.ടി.സി ഡിപ്പോക്കും ഗാരേജിനുമായി ഗ്രാമപഞ്ചായത്ത്​ വിട്ടുനൽകിയിട്ടുണ്ട്. നല്ലനിലയിൽ പ്രവർത്തിച്ച ഗാരേജ് നിർത്തലാക്കാനുള്ള നീക്കം ഉപേക്ഷിക്കണമെന്നും ഇതിനെതിരെ ശക്തമായ പ്രക്ഷോഭം സംഘടിപ്പിക്കുമെന്നും യു.ഡി.എഫ് പന്തളം നഗരസഭ പാർലമെന്‍ററി പാർട്ടി നേതാക്കളായ കെ.ആർ. വിജയകുമാർ, കെ.ആർ. രവി, പന്തളം മഹേഷ്, സുനിത വേണു, രത്നമണി സുരേന്ദ്രൻ എന്നിവർ പറഞ്ഞു.