പന്തളം ജങ്​ഷനിലെ സിഗ്നൽ സംവിധാനം പുനഃക്രമീകരിച്ചിട്ടും കുരുക്കഴിഞ്ഞില്ല

പന്തളം: ജങ്​ഷനിലെ സിഗ്നൽ സംവിധാനം പുനഃക്രമീകരിച്ചിട്ടും ഗതാഗതക്കുരുക്കിന് അയവില്ല. ഒരാഴ്ചമുമ്പ് സിഗ്നൽ സംവിധാനം കേടായതിനെത്തുടർന്നാണ് പുനഃക്രമീകരിച്ചത്​. ഇപ്പോൾ പഴയ ദിശക​ളൊക്കെ മാറി. മുമ്പ് എം.സി റോഡിലെ ഒരുഭാഗം കഴിഞ്ഞാൽ ജങ്​ഷന്​ കിഴക്കുള്ള റോഡിലൂടെയാണ്​ വാഹനങ്ങൾ കടന്നുപോയിരുന്നത്. എന്നാൽ, സിഗ്നൽ സംവിധാനം പുനഃക്രമീകരിച്ചതോടെ ഇപ്പോൾ എം.സി റോഡിൽ രണ്ട് ഭാഗവും കഴിഞ്ഞശേഷമേ മാവേലിക്കര-പത്തനംതിട്ട റോഡിലേക്ക് വാഹനങ്ങൾക്ക്​ കടന്നുപോകാനാകൂ. ദിശ മാറിയെങ്കിലും ഗതാഗതക്കുരുക്കിന് പരിഹാരമായിട്ടില്ല എം.സി റോഡിൽ മണിക്കൂറുകളോളം ഗതാഗതക്കുരുക്ക് അനുഭവപ്പെടുകയാണ്. വി.ഐ.പികളുടെ വാഹനങ്ങൾ ചീറിപ്പായുപ്പോൾ പൊലീസ് സിഗ്നൽ സംവിധാനം ഓഫാക്കുകയും ചെയ്യും. സ്കൂൾ തുറന്നതോടെ തിരക്കേറിയ പന്തളത്ത് തിങ്കളാഴ്ച രാവിലെ മണിക്കൂറുകളോളം രോഗിയുമായി എത്തിയ ആംബുലൻസും ഗതാഗതക്കുരുക്കിൽ അകപ്പെട്ടു. ഫോട്ടോ: എം.സി റോഡിൽ പന്തളം ജങ്​ഷനിലെ ഗതാഗതക്കുരുക്കിൽ അകപ്പെട്ട ആംബുലൻസ്