ആ​രും എത്തിയില്ല; പന്തളം നഗരസഭ യോഗപരിശീലനം മാറ്റി

പന്തളം: നഗരസഭ മാതൃക ഹോമിയോ ആശുപത്രിയുടെ നേതൃത്വത്തിൽ നഗരസഭയുടെ ആഭിമുഖ്യത്തിൽ ബുധനാഴ്ച നടത്താൻ തീരുമാനിച്ച യോഗ പരിശീലന പരിപാടി ആരും എത്താത്തതുമൂലം മാറ്റി. ചൊവ്വാഴ്ച രാത്രിയിൽ കൗൺസിലർമാരുടെ വാട്സ്​ആപ്​ ഗ്രൂപ്പിൽ ഒരു നോട്ടീസി‍ൻെറ ഫോട്ടോ ഇട്ടത് മാത്രമായിരുന്നു പരിപാടിയുടെ അറിയിപ്പ്. മുട്ടാർ കരയോഗ ഹാളിലാണ്​ യോഗ പരിശീലനം സംഘടിപ്പിച്ചത്. അറിയിപ്പ് ലഭിച്ച കൗൺസിലർമാർ സ്ഥലത്തെത്തി. എന്നാൽ, 33 വാർഡുകളുള്ള നഗരസഭയിൽനിന്ന് ഒരു വ്യക്തിപോലും പരിശീലനത്തിന്​ എത്തിയില്ല. എൽ.ഡി.എഫ് പാർലമെന്‍ററി പാർട്ടി ലീഡർ ലസിത നായർ സ്ഥലത്തെത്തി ഉദ്​ഘാടനം നടത്തുന്നതിൽ പ്രതിഷേധിച്ചു. വാർഡുകളിൽ ജനങ്ങളെ അറിയിക്കാതെ, ഒരു വാർത്തപോലും നൽകാതെ നടത്താൻ സമ്മതിക്കില്ലെന്ന് പ്രതിപക്ഷം നിലപാടെടുത്തു. പരിശീലനം ആരംഭിക്കാൻ ഒരുങ്ങിയതോടെ ബഹളമായി. ഒടുവിൽ ആരോഗ്യ സ്ഥിരംസമിതി ചെയർമാൻ രാധാകൃഷ്ണൻ ഉണ്ണിത്താൻ നടത്തിയ ഒത്തുതീർപ്പ് ചർച്ചയെത്തുടർന്ന് എല്ലാവർക്കും അറിയിപ്പ് കൊടുത്ത്​ അടുത്തയാഴ്ച പരിശീലനം നടത്താമെന്ന ധാരണയിൽ എത്തുകയായിരുന്നു.