ലക്ഷ്​മി ഇനി കരുണാലയത്തിന്റെ സംരക്ഷണത്തിൽ

വടശേരിക്കര: സംരക്ഷകനായിരുന്ന പിതാവ്​ അവശനായതോടെ ലക്ഷ്മിയെ കിടങ്ങന്നൂർ കരുണാലയം ഏറ്റെടുത്തു. പോളിയോ ബാധിച്ച്​ അവശയായ ലക്ഷ്മിക്ക്​ ഇത്രകാലവും സംരക്ഷകനായത്​ പിതാവ്​ വടശ്ശേരിക്കര കന്നാംപാലത്തിന് സമീപം കടമാംകുന്ന്​ സ്വദേശി ചരുവിൽ ഗോപാലകൃഷ്ണനായിരുന്നു. ഹൃദ്രോഗം ബാധിച്ച ഗോപാലകൃഷ്ണന്​ ഇനിയും മകളെ സംരക്ഷിക്കാനാകാത്ത അവസ്ഥയാണ്​. റാന്നി പൊലീസ് ഇൻസ്​പെക്ടര്‍ എം.ആര്‍. സുരേഷ് ഇടപെട്ടാണ് ലക്ഷ്മിയെ (28) കരുണാലയത്തില്‍ എത്തിച്ചത്. തീര്‍ത്തും വയ്യാതായ തനിക്ക് മകളെ സംരക്ഷിക്കാനാകില്ലെന്നും സഹായിക്കണമെന്നും ഗോപാലകൃഷ്​ണൻ ഇൻസ്​പെക്ടറോട് ആവശ്യപ്പെട്ടതോടെയാണ് അദ്ദേഹം ഇടപെട്ട് ക്രമീകരണങ്ങൾ ചെയ്തത്. രാവിലെ എസ്.ഐ ഹരികുമാറിന്‍റെ നേതൃത്വത്തില്‍ പൊലീസ് സ്റ്റേഷനിലെത്തിച്ച ലക്ഷ്മിയെ കരുണാലയം ചാരിറ്റബിൾ ട്രസ്റ്റ് ഭാരവാഹികളെ ഏൽപിച്ചു. Ptl rni _2 police ഫോട്ടോ: പോളിയോ ബാധിതയായ ലക്ഷ്മിയെ കിടങ്ങന്നൂർ കരുണാലയം ചാരിറ്റബിൾ ട്രസ്റ്റ് ഏറ്റെടുക്കുന്നു